Atli Freyr byrjaði sem bílstjóri hjá DHL árið 1997: Ráðinn framkvæmdastjóri DHL Express í Danmörku

Framkvæmdastjóri DHL á Íslandi færir sig um set til Danmerkur

Hefur verið ráðinn framkvæmdastjóri DHL Express í Danmörku.
Atli Freyr Hefur verið ráðinn framkvæmdastjóri DHL Express í Danmörku.

Atli Freyr Einarsson hefur verið ráðinn framkvæmdastjóri DHL Express í Danmörku en um er að ræða 500 manna fyrirtæki sem veltir árlega 9 milljörðum króna. Óhætt er að segja að saga Atla Freys innan DHL sé áhugaverð.

Í tilkynningu segir að Atli hafi unnið allan sinn starfsferil innan DHL og sem framkvæmdastjóri DHL á Íslandi síðastliðin sex ár. Hann hóf störf hjá fyrirtækinu sem bílstjóri árið 1997. Meðfram háskólanámi vann hann í útkeyrslu og í þjónustudeild í hlutastarfi. Eftir útskrift úr háskóla færði hann sig yfir í söludeild fyrirtækisins og var gerður að sölu- og markaðsstjóra árið 2005. Frá og með árinu 2010 hefur Atli gegnt stöðu framkvæmdastjóra DHL Express Íslandi.

„Staða DHL á Íslandi hefur verið sterk og markaðshlutdeild þeirra framúrskarandi. Sérstaklega hefur tekist vel til við að snúa erfiðri stöðu eftir hrun fyrirtækinu í vil,“ segir í tilkynningunni og þar bætir Atli við að framundan sé stór áskorun.

„Þetta er auðvitað mikil áskorun en umfram allt skemmtilegt tækifæri sem ekki er hægt að láta fram hjá sér fara,“ segir hann. Ekki hefur verið ráðið í framkvæmdastjórastöðuna á Íslandi að svo stöddu en gengið verður frá ráðningu í upphafi nýs árs.

Atli Freyr er kvæntur Önnu Svandísi Gísladóttur hjúkrunarfræðingi og eiga þau þrjú börn.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.