Þrír karlmenn á fertugsaldri, sem ákærðir voru fyrir sérstaklega hættulega líkamsárás og frelssviptingu gegn pari, voru sýknaðir í Héraðsdómi Reykjavíkur nú í morgun. Brotaþolarnir í málinu drógu framburð sinn til baka við aðalmeðferð málsins. Frá þessu greinir Vísir.
DV greindi frá því í október síðastliðnum að umrætt atvik hefði átt sér stað við verslunarmiðstöðina Grímsbæ í Fossvogi í júlí 2014. Tveir sakborningana, Alvar Óskarsson, og Jónas Árni Lúðvíksson hafa áður hlotið þunga dóma fyrir aðild að umfangsmiklum fíkniefnamálum. Hlaut Alvar Óskarsson sjö og hálfs árs dóm árið 2008 fyrir aðild sína að Pólstjörnumálinu svokallaða á meðan Jónas Árni hlaut fimm ára dóm fyrir aðils sína að Papeyjarmálnu árið 2009.
Voru mennirnir sakaðir um að hafa veist að parinu, sem er á fimmtugs og sextugsaldri og slegið þau í andlitið með krepptum hnefa, auk þess að hafa tekið utan um háls konunnar og hert að. Þá voru þeir sakaðir um að hafa þvingað fólkið inn í bifreið en konan mun þá hafa komist út um glugga bifreiðarinnar og náð að flýja. Leitaði hún á lögreglustöð í kjölfarið og tjáði lögreglu að mennirnir hefðu kýlt sig svo fast í andlitið að það losnaði um tennur. Þá voru sakborningarnir grunaðir um að hafa því næst ekið með manninn í Garðabæ, haldið honum föngnum í bílnum í dágóða stund og veist að honum.
Læknir sem tók á móti manninum á sjúkrahúsi bar vitni fyrir dómi og sagði áverka mannsins hafa verið mikla og grófa.
Við aðalmeðferð málsins, sem dæmt var í nú í morgun sagði konan að mennirnir hefðu aldrei veist að þeim eða svipt þau frelsi sínu. Jafnframt kvaðst hún ekki muna hvernig áverkar hennar voru tilkomnir. Þá sagði maðurinn einnig að engin frelsissvipting hefði átt sér stað. Einnig breytti vitni í málinu framburði sínum og bar fyrir sig minnisleysi.