26 ára gömul kona sem lögreglan leitaði að vegna rannsóknar hennar á meintri frelsissviptingu í Fellsmúla 9 í Reykjavík hefur gefið sig fram. Konan býr í íbúðinni þar sem talið er að manni hafi verið haldið í tvo sólarhringa og hann pyntaður. Var hún yfirheyrð af lögreglu og síðan látin laus.

Lögreglan á höfuðborgarsvæðinu leitar enn að sambýlismanni hennar, 26 ára gömlum Íslendingi, vegna málsins. Handtók hún tvo karlmenn í gær þegar málið kom upp en þeim hefur nú verið sleppt. Samkvæmt frétt Vísis.is telur lögreglan að þeir hafi ekki átt neina eða litla aðkomu að málinu. Því hafi ekki verið farið fram á gæsluvarðhald.