Það var í maí síðastliðnum að einstaklingur leitaði til lögreglunnar á Akureyri og tilkynnti hótanir um barsmíðar af hálfu manns, sem jafnframt reyndist vera svikull viðskiptavinur. Það sem gerir málið nokkuð sérstakt er að söluvaran var 20 grömm af maríjúana. Vísir greinir frá þessu.

Forsaga málsins er sú að fíkniefnasalinn kom á heimili viðskiptavinarins og hugðist selja honum efnið. Neitaði viðskiptavinurinn að borga, en í þess í stað hrakti hann fíkniefnasalann á brott með hótunum um barsmíðar. Leitaði þá fíkiefnasalinn til lögreglu og tilkynnti málið.

Var í kjölfarið gerð húsleit hjá umræddum viðskiptavini, sem var þar staddur ásamt öðrum manni. Við húsleitina fannst umrætt efni, auk þess sem þar fundust ofskynjunarsveppir og kannabisplöntur. Þeir félagar eru nú ákærðir fyrir fikniefnalagabrot, og þá er viðskiptavinurinn umræddi ákærður fyrir hótanir í garð fíkniefnasalans.

Á meðan er fíkniefnasalinn ákærður fyrir sölu á maríjúna, sem hann hugðist selja viðskiptavininum á 75 þúsund krónur. Hann er jafnframt grunaður um að hafa áður hagnast á sölu fíkniefna.

Þá kemur fram á vef Vísir að málið verði tekið fyrir í hérðasdómi Norðurlands eystra á næstu vikum.