Brottflutningi hins fimm ára gamla Eyjólfs Kristins Elvusonar hefur verið frestað um sinn en ráðgert var að hann yrði sendur út til Noregs 4. desember næstkomandi. Þar átti hann að verða fóstraður til 18 ára aldurs. Þetta staðfestir móðuramma Eyjólfs, Helena Brynjólfsdóttir, með færslu í Facebook-hópnum „Baráttan um barnið“. „Það er ennþá verið að vinna í málinu og við látum vita strax þegar nýjar fréttir berast. Ég veit að þetta leggst á hjörtu okkar allra,“ segir Helena enn fremur í færslunni.
Heimildir DV herma að málið sé á viðkvæmu stigi en að tillaga að lausn málsins hafi borist til innlendra stofnana og unnið sé að því hörðum höndum að fá farsæla lausn á málinu. Fram kom í frétt Stundarinnar nýlega að aðstandendum hafi verið ráðlagt að hætta að berjast fyrir framtíð drengsins í gegnum fjölmiðla ef til greina ætti að koma að Eyjólfur Kristinn yrði fóstraður hérlendis. Það rímar við upplifun DV því aðstandendur Eyjólfs hafa verið ófáanlegir til viðtals í vikunni. Það kom þó fram í stuttu spjalli við aðstandendur að bjartsýni ríkti meðal þeirra um að farsæl lausn væri innan seilingar.