Fengi rúmlega 34 prósent atkvæða ef kosið væri í dag
Sjálfstæðisflokkur fengi flesta borgarfulltrúa ef gengið yrði til sveitastjórnarkosninga í dag en núverandi meirihluti fengi þó fjórtán borgarfulltrúa gegn níu fulltrúum minnihlutans. Samfylking og Framsókn tapa talsverðu fylgi. Þetta er samkvæmt niðurstöðum könnunar sem Fréttablaðið birtir og fjallar um í dag.
Sjálfstæðisflokkurinn í borginni mælist með 31,9 prósenta fylgi, Samfylkingin kemur næst með 17,1 prósent, þá VG (15,4%), Píratar (14,6%), Björt framtíð (13%), Framsóknarflokkur (4%), aðrir flokkar (3,9%).
„Þetta er í átt við þær meginlínur sem við sáum í þingkosningunum í október. Sjálfstæðisflokkur bætir við sig og Samfylkingin tapar miklu fylgi,“ segir Grétar Þór Eyþórsson, prófessor í stjórnmálafræði við Háskólann á Akureyri, við Fréttablaðið en Samfylkingin fékk 31,9 prósenta fylgi í kosningunum árið 2014.
Grétar segir þó að staða Samfylkingarinnar í borginni, sem er mun betri en staða flokksins í landsmálunum, gæti bent til sterkrar stöðu Dags B. Eggertssonar borgarstjóra. Könnun fréttastofu 365 var gerð dagana 12. til 14. desember.