118 milljónum alls veitt í styrki frá 2013 – Lilja setti 1,8 milljónir í að endurnýja tölvur starfsmanna ráðuneytisins – Guðni Th. endurgreiddi styrk eftir forsetakjörið
Ráðherrar ríkisstjórnarinnar útdeildu alls rúmlega 31,5 milljónum króna af ráðstöfunarfé sínu til að styrkja hin ýmsu verkefni og málefni á árinu 2016. Alls hafa ráðherrar Framsóknarflokks og Sjálfstæðisflokks veitt 118 milljónum króna til styrkþega frá því að ríkisstjórn flokkanna tók við árið 2013.
DV óskaði eftir sundurliðuðum upplýsingum frá hverju ráðuneyti yfir úthlutanir af ráðstöfunarfé ráðherra, sem oftast er kallað skúffufé, það sem af er árinu 2016. Óskað var eftir upplýsingum um fjárhæð, styrkþega, tilefni styrkveitingar og hvenær hver styrkur var veittur. Þar sem ráðherraskipti höfðu orðið á árinu var beðið um sundurliðun úthlutana eftir ráðherrum.
Meðal þess sem ráðherrar vörðu fjármunum ríkisins í að þessu sinni var að styrkja knattspyrnufélag Litla-Hrauns, svo hægt væri að fá þjálfara til að stýra reglulegum æfingum og þá notaði utanríkisráðherra rúmlega 1,8 milljónir króna í að endurnýja tölvukost starfsmanna ráðuneytisins í síðasta mánuði, svo fátt eitt sé nefnt. Athygli vekur einnig að Guðni Th. Jóhannesson, forseti Íslands, ákvað að endurgreiða styrk frá utanríkisráðherra eftir að ljóst var að hann yrði forseti. Einhverjir ráðherrar hafa haldið áfram að veita styrki eftir kosningar.
Svörin sem fengust voru misítarleg. Sum ráðuneyti veittu upplýsingar um dagsetningar styrkjanna en hjá öðrum fengust þær upplýsingar ekki. Óskað var eftir upplýsingum um styrkveitingar ársins 2016 sérstaklega þar sem þegar hafði verið greint frá úthlutunum áranna 2013, 2014 og 2015 í Fréttablaðinu í byrjun þessa árs. Upplýsingar um úthlutanir 2016 höfðu hins vegar ekki birst áður, fyrr en nú. Árin á undan höfðu ráðherrar alls úthlutað 86,7 milljónum króna samkvæmt þeim upplýsingum sem Fréttablaðið birti, en að viðbættum fjárútlátum ráðherranna í ár nemur heildarupphæðin rúmlega 118 milljónum króna.
Greinin heldur áfram fyrir neðan töfluna
Sigmundur Davíð Gunnlaugsson, þáverandi forsætisráðherra: 5,4 milljónir
Kristján Þór Júlíusson heilbrigðisráðherra: 7,9 milljónir
Eygló Harðardóttir, félags- og húsnæðismálaráðherra: 8,4 milljónir
Ragnheiður Elín Árnadóttir, iðnaðar- og viðskiptaráðherra: 9,1 milljón
Gunnar Bragi Sveinsson, þáverandi utanríkisráðherra: 7,1 milljón
Bjarni Benediktsson, fjármála- og efnahagsráðherra: 5,5 milljónir
Sigurður Ingi Jóhannsson, þáv. sjávarútvegs- og landbúnaðarráðherra: 7,2 milljónir
Sigrún Magnúsdóttir umhverfisráðherra (tók við 1. jan. 2015) ráðuneytið heyrði undir Sigurð Inga þar á undan: 6,5 milljónir
Illugi Gunnarsson, mennta- og menningarmálaráðherra: 13,1 milljón
Ólöf Nordal innanríkisráðherra (frá des. 2014) þar áður Hanna Birna Kristjánsdóttir: 16,5 milljónir
Alls úthlutað af ráðherrum á árunum 2013–2015: 86,7 milljónir króna
Alls að árinu 2016 meðtöldu: 118 milljónir króna
Þótt til séu verklagsreglur um ráðstöfunarfé ráðherra í hverju ráðuneyti þá eru engar samræmdar reglur til um þessar úthlutanir. Skúffufé ráðherra hefur margoft verið gagnrýnt í gegnum tíðina, meðal annars fyrir ógagnsæi og að með því geti ráðherrar dælt út ríkisfé að eigin geðþótta eftir hugðarefnum.
Í hverjum fjárlögum er ákveðin upphæð eyrnamerkt liðnum ráðstöfunarfé ráðherra en einnig hefur verið heimilt að flytja afgang frá árinu áður til þess næsta. Sérhverjum er heimilt að senda inn umsókn um styrk til ráðherra. Í reglum forsætisráðuneytisins er miðað við að ráðherra sé heimilt að styrkja málefni og verkefni sem „stuðla að framgangi íslenskra hagsmuna og til almannaheilla.“ Umsóknum þurfa að fylgja upplýsingar um umsækjanda, til hvers styrkurinn er ætlaður, kostnaðaráætlun og fjárhæð styrks. Forsætisráðuneytið, í þessu tilfelli, getur síðan gert kröfu um að styrkþegi skili að verkefni loknu greinargerð um framgang þess og ráðstöfun styrksins. Ef það kemur í ljós að styrkfé hafi ekki verið varið í þeim tilgangi sem ætlað var getur ráðuneytið krafist endurgreiðslu.
Almennt er það þó svo að það er ákvörðun hvers og eins ráðherra hvort hann styrki aðeins málefni sem heyra undir verksvið hans ráðuneyti, eða leiti út fyrir þann ramma.
Átta styrkir eftir að hann varð forsætisráðherra
Sigmundur Davíð Gunnlaugsson veitti tæpa milljón í styrki af ráðstöfunarfé sínu áður en hann sagði af sér í kjölfar Wintris-málsins í byrjun apríl. Sigurður Ingi Jóhannsson, sem þá tók við hefur síðan veitt 1,1 milljón króna í átta verkefni, eftir að hafa haldið að sér höndum í þeim efnum í sjávarútvegs- og landbúnaðarráðuneytinu. Meðfylgjandi tafla sýnir veitta styrki frá 1. janúar til 8. desember.
Verkefni | Upphæð í kr. | Ráðherra |
---|---|---|
Jarðskjálftaráðstefna á Húsavík 31. maí–3. júní 2016, Þekkingarnet Þingeyinga, Ragnar Stefánsson | 500.000 | Sigmundur Davíð |
Vopnafjarðarskóli, Lego hönnunarkeppni á Tenerife | 150.000 | Sigmundur Davíð |
Íþróttasamband lögreglumanna, Sigvaldi Eggertsson, – Eftir einn ei aki neinn – átak gegn ölvunarakstri | 30.000 | Sigmundur Davíð |
Barnaspítali Hringsins, Sólveig S. Hafsteinsdóttir barnalæknir. Ráðstefna NOBHO/NOBOS, um krabbamein hjá börnum 27.–31. maí 2016 | 300.000 | Sigmundur Davíð |
Afrika Lole – til að halda Fest Afrika 2016 | 50.000 | Sigurður Ingi |
Kór Langholtskirkju, til að halda uppi menningarstarfi fyrir ungt fólk | 100.000 | Sigurður Ingi |
Skákfélagið Hrókurinn, Hrafn Jökulsson, vegna verkefna Hróksins á Grænlandi og Íslandi | 50.000 | Sigurður Ingi |
Jóhann Friðrik Friðriksson, málþing um mikilvægi heilsueflingar | 100.000 | Sigurður Ingi |
Haukur Arnþórsson, rannsókn, ritun og útgáfa bókar um störf Alþingis í aldarfjórðung 1991–2016 | 300.000 | Sigurður Ingi |
Hinsegin dagar í Reykjavík 2016 | 200.000 | Sigurður Ingi |
Karlakór Reykjavikur, Gestur Svavarsson, vegna kostnaðar við 90 ára afmæli árið 2016. | 150.000 | Sigurður Ingi |
Jólahátíð fatlaðra, André Bachmann Sigurðsson | 150.000 | Sigurður Ingi |
Sigmundur Davíð Gunnlaugsson: | 980.000 kr. | |
Sigurður Ingi Jóhannsson | 1.100.000 kr. | |
Alls veitt af ráðstöfunarfé ráðherra: | 2.080.000 kr. |
Lilja endurnýjaði tölvur starfsfólks fyrir 1,8 milljónir – Guðni Th. endurgreiddi styrk
Lilja Alfreðsdóttir utanríkisráðherra nýtti 1,8 milljónir af ráðstöfunarfé sínu til að endurnýja bágborinn tölvukost starfsmanna utanríkisráðuneytisins þann 15. nóvember síðastliðinn, rúmum tveimur vikum eftir kosningar. Er þetta langhæsti styrkurinn sem nokkur ráðherra veitti af skúffufé sínu á árinu 2016 en alls veitti hún tæpar 2,4 milljónir í styrki af skúffufé sínu.
Samkvæmt upplýsingum frá ráðuneytinu hefur endurnýjun á tölvubúnaði fyrir starfsmenn þess gengið hægt vegna aðhalds í rekstri. Tölvukostur hafi því verið orðinn bágborinn og nauðsynlegt að bæta úr því.
„Ráðherra valdi að flýta fyrir endurnýjuninni og nýta hluta af sínu ráðstöfunarfé til þess. Tölvudeild ráðuneytisins var falið að kaupa búnaðinn og fylgja þar reglum sem gilda um innkaup hins opinbera.“ Óhætt er að fullyrða að Lilja hafi ekki skaðað vinsældir sínar meðal starfsmanna með þessari ákvörðun.
Lilja tók við embætti af Gunnari Braga Sveinssyni þann 8. apríl síðastliðinn en greint hafði verið frá því að Gunnar Bragi nýtti síðasta dag sinn í utanríkisráðuneytinu til að veita 950 þúsund krónum í styrki, vitandi að hann væri á leið í sjávarútvegs- og landbúnaðarráðherrastólinn. Athygli vekur að nokkrum dögum áður, þann 30. mars hafði Gunnar Bragi veitti Guðna Th. Jóhannessyni, styrk upp á 150 þúsund krónur. Tekið er fram í svari ráðuneytisins að styrkurinn hafi verið verið endurgreiddur 1. júlí, eða 6 dögum eftir forsetakosningar þegar ljóst var að Guðni væri á leið á Bessastaði og mánuði áður en hann tók formlega við embætti.
Verkefni | Upphæð í kr. | Dagsetning | Ráðherra |
---|---|---|---|
Guðni Th. Jóhannesson c/o HÍ, styrkur v. útgáfu um viðurkenningu Íslands á Eystrasaltsríkjunum | 150.000 (1) | 30. mars | Gunnar Bragi |
Þjóðdansahópurinn Sporið í Borgarnesi v. kynningar á ísl. þjóðdönsum í Vesturheimi | 250.000 | 7. apríl | Gunnar Bragi |
Kómedíuleikhúsið Ísafirði v. leikferðar til Spánar | 250.000 | 7. apríl | Gunnar Bragi |
Landsbyggðavinir v. „Framtíðin er núna“ | 150.000 | 7. apríl | Gunnar Bragi |
Landgræðsla ríkisins v. „Grazing in a changing Nordic region“ í Hörpu | 300.000 | 7. apríl | Gunnar Bragi |
Árni Snævarr, c/o Upplýsingaskrifstofa SÞ, v. sýningar heimildamyndar Demain um umhverfismál í Bíó Paradís | 100.000 | 27. apríl | Lilja |
King Hussein Cancer Foundation, Jórdaníu www.khcc.jo/ í minningu Stefaníu Reinhardsdóttur, aðalræðismanns Íslands í Jórdaníu | 125.000 | 23. maí | Lilja |
Anna Gyða Sigurgísladóttir, Andrea Björk Andrésdóttir og Berglind Sunna Stefánsdóttir, c/o Reconesse ehf. v. „European Celebration of Women in Computing“ | 75.000 | 4. ágúst | Lilja |
Skákfélagið Hrókurinn, styrkur vegna leiðangurs til Ammassalik-svæðisins á Grænlandi | 250.000 | 10. október | Lilja |
Utanríkisráðuneytið, til endurnýjunar á tölvubúnaði fyrir starfsmenn | 1.848.000 | 15. nóvember | Lilja |
Gunnar Bragi Sveinsson: | 950.000 kr. | ||
Lilja Alfreðsdóttir: | 2.398.000 kr. | ||
Alls veitt af ráðstöfunarfé ráðherra: | 3.348.000 kr. |
(1) Guðni Th. Jóhannesson endurgreiddi styrkinn 1. júlí 2016, 6 dögum eftir forsetakosningar og mánuði áður en hann tók formlega við embætti.
Ólöf styrkti knattspyrnufélag Litla-Hrauns
Ólöf Nordal innanríkisráðherra er með gjafmildari ráðherrum ársins en hún veitti ríflega 5,4 milljónir króna af skúffufé sínu í margvísleg verkefni. Styrkirnir voru afgreiddir á tímabilinu febrúar til október og engir styrkir afgreiddir eftir það samkvæmt upplýsingum frá ráðuneytinu.
Einn styrkþegi vekur kannski meiri athygli en aðrir en það er knattspyrnufélag Litla-Hrauns sem innanríkisráðherra styrkti um 100 þúsund krónur. Samkvæmt upplýsingum frá ráðuneytinu var þetta styrkur vegna kostnaðar við að fá þjálfara til að mæta á Litla-Hraun og halda reglulegar æfingar.
„Félagið heitir formlega Knattspyrnuvinafélag Litla-Hrauns og virðist hafa fengið styrki víðar að til að standa undir fjárfestingum við grasvöll og fleira varðandi þetta.“
Verkefni | Upphæð í kr. |
---|---|
Áfangaheimilið Dyngjan | 150.000 |
Norrænt samstarf laganema Orators í febrúar | 150.000 |
Evrópuvika gegn kynþáttamisrétti | 150.000 |
Rannsókn á aðstæðum barna, réttindum og skyldum aðstandenda | 750.000 |
Lagadagur Nomos-félags laganema við HÍ | 100.000 |
Málflutningsteymi HR v. málflutningskeppni Willem C Vis Int. Comm.Arbitration Moot | 150.000 |
Verkefnið „Heilsurækt fanga“ | 150.000 |
Club Lögberg v. Norrænu málflutningskeppninnar á Íslandi | 350.000 |
Kennsla í íslensku fyrir útlendinga | 200.000 |
Verkefni um umfang, eðli og kostn. v. heimilisofb. karla í garð kvenna | 100.000 |
Hinsegin dagar í Reykjavík | 300.000 |
Þjónustusamningur Neytendasamtakanna 2015 | 300.000 |
Ferð á námskeið fyrir ákærendur | 100.000 |
Heimildamynd v. Scorebysunds á Grænlandi | 600.000 |
Minnisvarði um Látra-Björgu Einarsdóttur | 500.000 |
FC Sækó – Geðveikur fótbolti v. Geðsviðs Landspítalans og Hlutverkaseturs | 150.000 |
FRÆ – Félag um ritun ævisögu Jean Eggerts Claessen | 200.000 |
Jólahátíð fyrir fatlaða | 150.000 |
Knattspyrnufélag Litla-Hrauns | 100.000 |
Sálrænn stuðningur v. viðbragðsaðila í neyðarþjónustu á Íslandi | 300.000 |
Varðberg – samtök um vestræna samvinnu og alþjóðamál | 500.000 |
Alls veitt af ráðstöfunarfé ráðherra: | 5.450.000 kr. |
—
Fáir en stærri hjá Bjarna
Bjarni Benediktsson hefur aðeins styrkt fjögur verkefni það sem af er ári og virðist vera að vinna með að styrkja frekar færri verkefni um hærri fjárhæðir en mörg minni. Upphæðin, 1.150 þúsund krónur, er sú lægsta sem nokkur ráðherra ríkisstjórnarinnar hefur veitt úr skúffu sinni í ár, en kannski viðeigandi að ráðherra fjármála og efnahags sýni slíka ráðdeild.
Verkefni | Upphæð í kr. |
---|---|
Hinsegin dagar í Reykjavík | 300.000 |
Jólahátíð fatlaðra | 250.000 |
Miðbaugs-minjaverkefnið /Equator Memorial Project | 300.000 |
Rannsókn á trausti Íslendinga til fjármálastofnana | 300.000 |
Alls veitt af ráðstöfunarfé ráðherra: | 1.150.000 kr. |
Gunnar Bragi í gjafastuði
Samkvæmt svari ráðuneytisins um úthlutanir sjávarútvegs- og landbúnaðarráðherra á árinu 2016 virðist Sigurður Ingi Jóhannsson ekkert hafa veitt af skúffufé sínu áður en hann hvarf úr ráðherrastólnum og varð forsætisráðherra í byrjun apríl. Fyrstu styrkirnir eru veittir í lok apríl, þegar Gunnar Bragi Sveinsson hafði tekið þar við. Eftir að hafa veitt 950 þúsund krónur á lokametrum sínum í utanríkisráðuneytinu hefur Gunnar Bragi sem ráðherra sjávarútvegs og landbúnaðar veitt 3,7 milljónir til viðbótar af ráðstöfunarfé sínu síðan þá.
Verkefni | Upphæð í kr. | Dagsetning |
---|---|---|
Jólaúthlutun Mæðrastyrksnefndar 2015 | 500.000 | 30. apríl |
Landsbyggðin lifi v. þátttöku í European Rural Parliament í Austurríki 3.–7. nóv. 2015 | 100.000 | 30. apríl |
Meistarafélag kjötiðnaðarmanna v. Fagkeppni kjötiðnaðarmeistara | 250.000 | 30. apríl |
Haukur Arnþórsson v. rannsóknar á sviði rafrænnar fjarþjónustu hins opinbera | 250.000 | 31. maí |
Bændasamtök Íslands v. Landbúnaðarverðlaunin 2015 | 150.000 | 31. maí |
Háskóli Íslands – Fyrirlestur Jane Goodall | 50.000 | 31. maí |
Góð stemming ehf. v. kynningar- og sölutjalds f. framleiðendur Beint frá býli á Kótelettunni 2015 | 400.000 | 31. maí |
Guðmundur Smári Veigarsson v. sumarbúða fyrir trans, intersex og kynsegin ungmenni | 100.000 | 7. júlí |
Ankra ehf. v. ferðar til Indlands á viðburði á vegum sendiráðs Íslands | 250.000 | 13. júlí |
Ysland ehf. Markaðsráðstefnan Big World Small Data í Háskólabíó | 100.000 | 19. júlí |
Háskólinn á Akureyri v. Norræna byggðarráðstefnan á Akureyri | 300.000 | 3. ágúst |
Hinsegin dagar í Reykjavík | 100.000 | 8. september |
Félag norrænna búvísindamanna. Styrkur til Íslandsdeildar NJF | 100.000 | 27. október |
Jólahátíð fatlaðra. André Bachmann | 100.000 | 28. október |
Síðasta haustið ehf. v. framleiðslu heimildamyndarinnar „Síðasta haustið“ | 400.000 | 31. október |
Háskólinn á Hólum í Hjaltadal v. rannsókna á landsmóti hestamanna | 200.000 | 31. október |
Brimnesskógar v. Endurheimta Brimnesskóga | 100.000 | 31. október |
Sjómannagarðurinn í Ólafsvík v. viðgerðar á minnismerki um látna sjómenn | 100.000 | 7. nóvember |
Ólafsdalsfélagið v. uppbyggingar í Ólafsdal | 150.000 | 7. nóvember |
Alls veitt af ráðstöfunarfé ráðherra: | 3.700.000 kr. |
Stórir styrkir Ragnheiðar Elínar
Ragnheiður Elín Árnadóttir, iðnaðar- og viðskiptaráðherra, hefur gefið tæpar 4,9 milljónir króna af ráðstöfunarfé sínu til sextán verkefna það sem af er ári. Aðeins Ólöf Nordal hefur varið meira úr skúffu sinni í ár. Hæsti einstaki styrkurinn rann til KLAK Innovit vegna Slush Play tölvuleikjaráðstefnunnar, 700 þúsund krónur. Þrjú verkefni fengu 500 þúsund krónur og tvö 400 þúsund krónur.
Verkefni | Upphæð í kr. | Dagsetning |
---|---|---|
Hollvinafélag Húna II, sigling til Færeyja í tengslum við Norrænu strandmenningarhátíðina | 400.000 | 30. mars |
Klúbbur matreiðslumeistara v. keppnisferðar kokkalandsliðsins á Ólympíuleika | 400.000 | 13. maí |
Ysland ehf. v. markaðsráðstefnan Big World Small Data í Háskólabíói | 250.000 | 31. maí |
Háskóli Íslands v. útgáfu ritsins „Saga utanlandsverslunar Íslendinga 900–2010 | 500.000 | 31. maí |
Team Spark, nemendafélag. Stuðningur við kappaksturslið HÍ 2015–16 | 329.664 | 1. júní |
Golfsamband Íslands v. Evrópumóts kvenna í golfi á Urriðavelli | 500.000 | 21. júní |
Hafnarfjörður, keramik- og hönnunarsýning í Hafnarborg | 100.000 | 4. ágúst |
Sjálfsbjörg, styrkur fyrir hjálparmenn í ferðir fatlaðra | 100.000 | 4. ágúst |
Drakó films ehf., v. útgáfu bókarinnar Forystuþjóð – jafnréttismál | 500.000 | 4. ágúst |
Landsbyggðarvinir v. verkefnisins „Framtíðin er núna!“ | 200.000 | 11. ágúst |
Málarameistarafélagið v. þings norrænna málarameistara N.M.O. | 200.000 | 11. ágúst |
Flugdrekarnir félagasamtök v. Blik í auga – Kántrý | 100.000 | 7. september |
Hinsegin dagar í Reykjavík | 100.000 | 8. september |
RIFF. Alþjóðleg kvikmyndahátíð í Reykjavík | 250.000 | 21. september |
KLAK Innovit ehf., v. Slush Play | 700.000 | 13. október |
Félag heyrnarlausra. Táknmálsstúdíó til að vinna myndefni fyrir heyrnarlausa | 250.000 | 31. október |
Alls veitt af ráðstöfunarfé ráðherra: | 4.879.664 kr. |
Illugi styrkti unga Lego-snillinginn
Illugi Gunnarsson veitti alls 25 verkefnum styrki á árinu fyrir alls tæpar 4,6 milljónir króna. Einn þeirra hæstu rann til hins unga Brynjars Karls Birgissonar, sem varð þjóðþekktur og gott betur eftir að hann setti saman 6,5 metra líkan af Titanic úr Lego-kubbum. Afrekið varð til þess að Brynjari Karli var boðið á TEDxKids-ráðstefnuna í El Cajon í Kaliforníu þar sem hann flutti tölu. Eins og fram kemur í svari ráðuneytisins var styrkur Illuga upp á 350 þúsund krónur veittur vegna þeirrar ferðar unga Lego-snillingsins.
Verkefni | Upphæð í kr. |
---|---|
Evrópusamband píanókennara, alþjóðleg ráðstefna píanókennara | 500.000 |
Félag heyrnarlausra, framleiðsla á fræðslu-, frétta- og kynningarefni | 100.000 |
Jónína Bjartmarz, Iceland Europe Travel, sýning á INUK kvikmyndinni á ráðstefnu | 43.400 |
Urður, Jón Þ. Þór, bók með æviþáttum allra forseta Bandaríkjanna | 300.000 |
Brynjar Karl Birgisson í TED X Kids (Lego-Titanic) | 350.000 |
HÍ, Ögmundur Jónasson/EDDA öndvegissetur, ráðst. um mannréttindi | 300.000 |
Músík í Mývatnssveit, tónleikar um páska 2016 | 100.000 |
Gamlir Fóstbræður, þátttaka í alþjóðlegu kóramóti | 200.000 |
Samkór Kópavogs, söngferðalag til Kanada | 100.000 |
Samtök líffræðikennara, Ólympíuleikar í líffræði 2016 | 200.000 |
Óðfræðifélagið Boðn, útg. tímaritsins Sónar | 50.000 |
Bridgefélag Siglufjarðar, alþj. bridgemót á Siglufirði í sept. | 250.000 |
Átak, fél. fólks með þroskahömlun, stoltganga í sept. | 50.000 |
Kammersveit Reykjavíkur, útg. sögu félagsins | 200.000 |
Óðfræðifélagið Boðn, útg. tímaritsins Sónar – viðbótarstyrkur | 200.000 |
Íslensku tónlistarverðlaunin, heiðursverðlaun Ísl. tónlistarverðlaunanna 2016 | 300.000 |
Lakehouse, Harpa Fönn Sigurjónsdóttir, leikverkið Í samhengi við stjörnurnar | 150.000 |
Landssamband hestamanna, útgáfa rits um gangtegundir | 300.000 |
Hlíf Sigurjónsdóttir, útvarpsþættir um Björn Ólafsson fiðluleikara | 100.000 |
Þjóðlagasetur sr. Bjarna Þorsteinssonar | 200.000 |
Sögufélagið | 200.000 |
Íþróttasamband fatlaðra, samstarf ísl. lögreglu við Special Olympics á Íslandi | 50.000 |
André Bachmann, jólaskemmtun fyrir fatlaða 2016 | 50.000 |
Skákfélagið Hrókurinn, verkefni á Íslandi og Grænlandi | 200.000 |
Elísabet Kristín Jökulsdóttir, kynning á bókinni Enginn dans við Ufsaklett | 100.000 |
Alls veitt af ráðstöfunarfé ráðherra: | 4.593.400 kr. |
Gulli byggir fékk hæsta styrkinn
Eygló Harðardóttir er eini ráðherra ríkisstjórnarinnar sem ávallt hefur upplýst jafnóðum um hvert ráðstöfunarfé hennar rennur á vef ráðuneytisins. Ekki reyndist því þörf á að kalla sérstaklega eftir þeim upplýsingum enda gagnsæið til eftirbreytni.
Rúmar 2,3 milljónir hafa runnið úr skúffu Eyglóar á árinu en athygli vekur að hæsti styrkurinn, 300 þúsund krónur, rann til „Gulli byggir“ til að fjalla um norsk/sænsk einingahús. Smiðurinn, útvarpsmaðurinn og dagskrárgerðarmaðurinn Gunnlaugur Helgason, hefur stýrt sjónvarpsþætti með sama nafni á Stöð 2 undanfarin misseri. Í ljósi þess að Eygló er ráðherra húsnæðismála er því kannski ekki langsótt að Gulli hafi fengið styrk til að fjalla um einingahús.
Verkefni | Upphæð í kr. |
---|---|
Íþróttasamband lögreglumanna, vegna bæklings | 30.000 |
Geðhjálp og RKÍ, v. heimsóknar DR. Gbor Maé‘s | 200.000 |
Hjálparstarf kirkjunnar | 25.000 |
Málbjörg, félag um stam, v. tímarits | 10.000 |
Hagsmunasamband áhugafólks um smáheimili v. húsnæðis f. stofnfund | 100.000 |
Félag kvenna í vísindum v. aðalfundar | 70.000 |
Sjálfsbjörg v. sölu á pennum og minnisblokkum | 18.400 |
Almannaheill v. fundar fólksins | 291.895 |
Samtökin v. IDAHO ráðstefnunnar | 111.580 |
Hinsegin dagar í Reykjavík | 150.000 |
Fræðslunetið v. kynfræðslu fyrir fullorðið fatlað fólk | 100.000 |
Félag íslenskra sérkennara v. ráðstefnunnar frá hömlum til hæfni | 120.000 |
Jafnréttisstofa v. 40 ára afmælis jafnréttislaga | 100.000 |
Ríkissáttasemjari v. norrænnar ráðstefnu ríkissáttasemjara | 100.000 |
André Bachman v. jólahátíðar fatlaðra | 150.000 |
Ragnhildur Steinunn Jónsdóttir og Edda Sesselja Traustadóttir v. útg. bókarinnar Forystuþjóð | 250.000 |
Sjálfsbjörg v. hjálparmanna í ferðir fatlaðs fólks | 100.000 |
Gulli byggir, styrkur til að fjalla um norsk/sænsk einingahús | 300.000 |
Samtök um endómetríósu v. fræðsluferðar á göngudeild fyrir konur með endómetríósu | 100.000 |
Alls veitt af ráðstöfunarfé ráðherra: | 2.326.875 kr. |
Margir litlir styrkir
Sigrún Magnúsdóttir veitti rúmar 2,2 milljónir króna til 22 verkefna á árinu. Hæsti styrkurinn nam 300 þúsund krónum og rann til Eflu hf. vegna rannsóknarverkefnis sem leiðir til minni losunar gróðurhúsalofts frá urðunarstöðum á Íslandi. Sigrún veitti þar af fjóra styrki í nóvember, eftir kosningar.
Verkefni | Upphæð í kr. | Dagsetning |
---|---|---|
Fræðsla og forvarnir, útgáfa og gerð á fræðsluefni á baragras.is | 7.000 | 20. maí |
Háskóli Íslands, v. komu dr. Jane Goodall | 50.000 | 20.maí |
Daði Már Steinsson, rannsókn á eftirspurn eftir grænni ferðamennsku | 100.000 | 20. maí |
Bókaútgáfan Hólar ehf., v. útgáfu bókarinnar „Viska fallandi vatns. Hugsað með eyfirskum fossum“ | 100.000 | 20. maí |
Brimnesskógar v. Endurheimta Brimnesskóga í Skagafirði | 100.000 | 20. maí |
Hlöðver Eggertsson v. námskeiðs hjá Kiwa Sverige | 50.000 | 20. maí |
Bjarni Reynarsson v. útgáfu á ritgerðarsafni um þróun og skipulag Reykjavíkur | 100.000 | 20. maí |
Kór Langholtskirkju, menningarstyrkur fyrir kórinn | 50.000 | 20. maí |
Skógrækt ríkisins | Hópefli starfsmanna nýrrar skógræktarstofnunar ríkisins | 100.000 |
Neytendasamtökin v. þýðingar og staðfæringar á smáforritinu Kemiluppen | 100.000 | 20. maí |
Landsbyggðarvinir v. rekstrarkostnaðar verkefnisins „Framtíðin er núna“ | 50.000 | 20. maí |
Landgræðsla ríkisins, norræn/alþjóðleg beitarráðstefna á Íslandi | 100.000 | 20. maí |
UNRIC (SÞ) Árni Þorvaldur Snævarr, v. sýningar á myndinni „Demain“ | 50.000 | 1. júní |
Efla hf. v. ranns.verkefnis sem leiðir til minni losunar gróðurhúsaloftt. frá urðunarstöðum á Íslandi | 300.000 | 1. júní |
Lífsmynd, v. heimildamyndar um landgræðslustarf | 70.000 | 2. júní |
RIFF, vegna verkefnisins „Önnur framtíð“ | 50.000 | 8. júlí |
Sigríður Kristjánsdóttir, endurútgáfa ritsins „Um skipulag bæja“ | 350.000 | 28. september |
Norm ráðgjöf og Aðgengi ehf., v. verkefnis um bætt aðgengi fatlaðs fólks að ferðamannastöðum | 200.000 | 17. október |
Ungmennafélag Íslands, umhverfisverkefni félagsins | 200.000 | 7. nóvember |
Brjóstheill – Samhjálp kvenna, samnorræn ráðstefna um brjóstakrabbamein | 50.000 | 7. nóvember |
Ómar Þ. Ragnarsson, v. verkefnisins „Orkunýtni – koma svo!“ | 50.000 | 7. nóvember |
Landvarðafélag Íslands, v. 40 ára afmælis félagsins | 50.000 | 10. nóvember |
Alls veitt af ráðstöfunarfé ráðherra: | 2.277.000 kr. |
Heldur sig við heilbrigðismál
Kristján Þór Júlíusson veitti átta styrki á árinu af skúffufé sínu fyrir samtals rúmlega 1,7 milljónir króna. Ráðherra heilbrigðismála virðist af verkefnunum að dæma halda sig innan verksviðs ráðuneytisins og styrkja málefni tengd heilbrigðismálum.
Verkefni | Upphæð í kr. | Dagsetning |
---|---|---|
Landspítalinn, Menntadeild vísinda- og þróunarsvið v/ferðar til Alþjóða læknaháskólans í Debrecen í Ungverjalandi til að stuðla að meiri nýliðun meðal íslenskra lækna | 200.000 | 18. mars |
Íþróttasamband lögreglumanna v. átaksins „Eftir einn ei aki neinn“ | 25.000 | 27. apríl |
NOPHO/NOBOS vegna alþjóðlegrar ráðstefnu um krabbamein hjá börnum | 300.000 | 3. maí |
Félag ísl. fíkniefnalögreglumanna v. auglýsingar gegn fíkniefnavá | 25.000 | 26. maí |
Kraftur – stuðningsfélag vegna norrænnar ráðstefnu Krafts á næsta ári | 200.000 | 13. október |
Hjólakraftur – styrkur till starfsemi félagsins | 200.000 | 12. október |
Grófin geðverndarmiðstöð – styrkur vegna starfsmenntaferðar Grófarinnar | 300.000 | 12. október |
Fagráð sjúkraflutninga, gerð fýsileikaskýrslu um þróun kerfis sjúkraflutninga með þyrlu | 500.000 | 27. október |
Alls veitt af ráðstöfunarfé ráðherra: | 1.750.000 kr. |