Samdi við Exton um leigu á hljóðkerfi fyrir Kórinn – Leitaði ekki eftir tilboðum
Kópavogsbær leitaði ekki eftir tilboðum í hljóðkerfi fyrir íþróttahúsið Kórinn áður en bæjaryfirvöld sömdu við fyrirtækið Exton um leigu á tækjum. Íþróttafélagið HK fór fram á að hljóðkerfi hússins yrði endurnýjað en formaður þess er einn eigenda og framkvæmdastjóri hjá Exton. Formaðurinn keypti sig inn í fyrirtækið í júlí eða í sama mánuði og Exton bauð Kópavogsbæ að leigja kerfið. Til greina kemur að bærinn kaupi hljóðkerfið en leigan hljóðar upp á átta milljónir króna í 17 mánuði.
„Leiguverðið er átta milljónir króna og í því er innifalin uppsetning, kennsla og viðhald. Þessi upphæð er ekki útboðsskyld og er undir mörkunum. Bærinn hefur í gegnum tíðina átt í margvíslegum viðskiptum við fyrirtækið og þeir hafa komið að einhverjum af tónleikunum í Kórnum,“ segir Sigríður Björg Tómasdóttir, upplýsingafulltrúi Kópavogsbæjar, aðspurð af hverju bærinn leitaði ekki tilboða í hljóðkerfi fyrir Kórinn.
Sigríður Björg segir að umhverfissvið bæjarins hafi þann 1. júlí síðastliðinn samið um leigu á tækjunum sem voru sett upp fyrir tónleika kanadísku poppstjörnunnar Justins Bieber í Kórnum. Tónleikarnir voru haldnir 9. september en leigusamningurinn tók gildi 1. september. Kópavogsbær var því byrjaður að greiða leigu þegar Sena Live hélt tónleikana en taka ber fram að hljóðkerfið var einungis hluti af þeim tækjabúnaði sem viðburðafyrirtækið notaði til tónleikahaldsins.
„Það kemur til greina að kaupa kerfið en það hefur ekki verið samið um það og ekki er gert ráð fyrir því í fjárhagsáætlun bæjarins 2017,“ segir Sigríður Björg.
Sigurjón Sigurðsson, formaður HK og framkvæmdastjóri lausnarsviðs Exton, segir í samtali við DV að fyrirtækið hafi haft frumkvæði að því að Kópavogsbær leigði kerfið. Í tilkynningu sem fjölmiðlum barst þann 7. júlí kom fram að Sigurjón og Ríkharður Sigurðsson, bróðir hans og núverandi framkvæmdastjóri Exton, hefðu keypt hlut í fyrirtækinu. Aðspurður staðfestir Sigurjón að HK hafi farið fram á að hljóðkerfi Kórsins yrði endurnýjað.
„HK hefur farið fram á það í gegnum tíðina að það verði sett viðunandi hljóðkerfi samkvæmt því sem KSÍ hefur krafist. Það heyrðist ekkert í kerfinu sem var þarna áður enda var það eldgamalt. Dómarar voru búnir að kvarta yfir því í langan tíma og þegar landsleikir og slíkt hefur verið haldið hefur annað kerfið verið leigt inn í húsið,“ segir Sigurjón og þvertekur fyrir að hann hafi setið beggja megin borðsins sem formaður HK.
„Þótt ég sé í sjálfboðaliðastarfi í íþróttahreyfingunni þá var það ekki þannig. Við ætluðum að selja kerfið úr landi en buðum bænum að ganga inn og leigja það. Við vorum þá beðin um að tiltaka verð í kerfið og þeir tóku því. Þetta var ekki flóknara en það,“ segir Sigurjón.
