Ronald Smith hóstaði og kúgaðist í þrettán mínútur áður en hann var úrskurðaður látinn
Ronald Smith, 45 ára karlmaður í Alabama, var tekinn af lífi á fimmtudagskvöld.
Smith var dæmdur fyrir morð á starfsmanni verslunar í Huntsville árið 1994, en hann var 23 ára þegar hann skaut starfsmanninn, Casey Wilson, til bana. Smith ætlaði að ræna verslunina.
Við réttarhöldin mæltu kviðdómendur með því að Smith fengi lífstíðarfangelsisdóm án möguleika á reynslulausn, en dómarinn í málinu, Lynwood Smith, ákvað að fara ekki eftir ráðleggingum kviðdómenda og dæmdi Smith til dauða.
Við réttarhöldin kom fram að Smith hefði verið virkur í skátunum á sínum yngri árum, en á unglingsárunum hefði hann farið að misnota áfengi. Hann skaut Wilson þremur skotum og játaði glæpinn í yfirheyrslum hjá lögreglu.
Verjendur Smith reyndu allt fram á síðasta dag að fá dauðadómnum breytt í lífstíðarfangelsi en allt kom fyrir ekki. Reyndu þeir að færa rök fyrir því að lyfin sem notuð eru við aftökur séu ekki örugg að því leyti að fangar finni ekki fyrir sársauka þegar lyfjunum er sprautað í þá.
Blaðamaður sem varð vitni að aftökunni í gærkvöldi sagði að aftakan hefði tekið 34 mínútur. Smith hefði hóstað og kúgast í um þrettán mínútur áður en hann var úrskurðaður látinn.
Smith var tuttugasti fanginn sem tekinn er af lífi í Bandaríkjunum það sem af er ári og annar fanginn í Alabama á árinu.