Laun þjóðkjörinna fulltrúa hækka alls um rúmar 279 milljónir króna á ársgrundvelli vegna ákvörðunar kjararáðs
Sú ákvörðun kjararáðs að hækka laun alþingismanna, ráðherra, forsætisráðherra og forseta Íslands umtalsvert hefur nánast sett íslenskt þjóðfélag á hliðina. Mánaðarlaun þjóðkjörnu fulltrúanna eru að hækka á einu bretti um hundruð þúsunda. Þegar aðeins er litið til hækkunarinnar nemur hækkun árslauna þessara 64 einstaklinga rúmum 279 milljónum á ári. DV tók til gamans saman hvað gera mætti fyrir þá upphæð.
Alþingismenn (53) hækka úr 762.940 kr. á mánuði í 1.101.194 kr. eða um 338.254 kr. hver.
Hækkun alls: 215.129.544 kr. á ári.
Ráðherrar (9) hækka úr 1.347.330 kr. á mánuði í 1.826.273 kr. eða um 478.943 kr. hver.
Hækkun alls: 51.725.844 kr. á ári.
Forsætisráðherra hækkar úr 1.490.813 kr. á mánuði í 2.021.825 kr. eða um 531.012 kr.
Hækkun alls: 6.372.144 kr. á ári.
Forseti Íslands hækkar úr 2.480.341 kr. á mánuði í 2.985.000 kr. eða um 504.659 kr.
Hækkun alls: 6.055.908 kr. á ári.
Hækkunin á ársgrundvelli nemur: 279.283.440 kr.
Greiða 89 verkamönnum lágmarkslaun í heilt ár
(Lágmarkslaun á Íslandi eru í dag 260 þúsund krónur eða 3.120.000 á ári)
Reka kjararáð í rúm 7 ár
(Kostnaður við kjararáð í fjárlögum fyrir árið 2016: 38,3 milljónir)
Greiða 58 menntuðum grunnskólakennurum laun í heilt ár.
(Grunnlaun grunnskólakennara: 397.555 kr. á mánuði – Árslaun: 4.770.660 kr.)
Greiða upp hallarekstur 7 framhaldsskóla – og eiga afgang
(Rekstrarhalli Menntaskólans á Akureyri, Kvennaskólans í Reykjavík, Flensborgarskóla, Fjölbrautaskóla Vesturlands, Fjölbrautaskóla Suðurlands, Verkmenntaskólans á Akureyri og Fjölbrautaskóla Snæfellinga nam 257 milljónum króna um síðustu áramót.)
Greiða 56 menntuðum leikskólakennurum laun í heilt ár.
(Grunnlaun leikskólakennara: 411.469 kr. á mánuði – Árslaun: 4.937.628 kr.)
Kaupa 25 nýja ráðherrabíla
(Miðað við meðalverð (11 milljónir) þeirra 7 nýju ráðherrabíla sem keyptir voru á síðasta kjörtímabili.)
Greiða 64 hjúkrunarfræðingum byrjunarlaun í ár.
(Algengustu byrjunarlaun hjúkrunarfræðinga í dag eru 359.563 kr. á mánuði skv. Félagi íslenskra hjúkrunarfræðinga – Árslaun: 4.314.756)
Greiða komugjöld 232.736 einstaklinga á heilsugæslustöðvar
(Almennt gjald fyrir komu á heilsugæslustöð á dagvinnutíma, kl. 8–16, er 1.200 krónur.)
Gefa 2.220 leikskólabörnum frítt að borða í ár
(Fæðisgjald barns í 7–9 tíma vistun og miðað við þrjár máltíðir á dag er 10.480 kr. á mánuði. 125.760 krónur á ári. Um 6.000 börn eru á leikskólum Reykjavíkur, auk 1.000 á einkareknum leikskólum.)
Taka á móti 88 flóttamönnum og styðja í 2 ár
(Við undirritun samnings um móttöku 55 sýrlenskra flóttamanna í nóvember í fyrra kom fram að greiðslur ríkisins til þriggja sveitarfélaga vegna verkefnisins myndu nema alls 173,4 milljónum króna. Gert var ráð fyrir stuðningi í tvö ár. Kostnaður við hvern flóttamann nam því miðað við þetta 3.152.727 kr.)