Fyrrverandi formaður fjárlaganefndar segir umfjöllun Kastljóss í gær mega rekja til „agenda RÚV og góða fólksins“
„Voru þessar myndir frá búinu? Voru þessar myndir kannski frá öðru hænsnabúi í öðru landi? Kastljós er þekkt fyrir að falsa myndir með umfjöllun – væri einnar messu virði að senda fyrirspurn um það,“ segir fyrrverandi þingmaðurinn og fyrrum formaður fjárlaganefndar Alþingis, Vigdís Hauksdóttir, um umfjöllun Kastsljóss í gær um fyrirtækið Brúnegg ehf.
Í umfjöllunni kom fram að fyrirtækið hefur ítrekað, allt frá árinu 2007, brotið lög um velferð dýra og blekkt neytendur. Hafa eigendur Brúneggs selt framleiðsluvörur sínar sem vistvænar landbúnaðarafurðir en aldrei uppfyllt að fullu skilyrði reglugerðar um velferð alifugla. Eggin eru seld á tæplega 40 prósenta hærra verði en venjuleg búrhænuegg. Stórfyrirtækin Bónus, Hagkaup og Krónan, og hverfisbúðin Melabúðin í vesturbæ Reykjavíkur, eru hætt að selja vörur fyrirtækisins.
„Eftir umfjöllun Kastljóss stendur þessi rekstraraðili ekki upp meir – enda leikurinn gerður til þess að knésetja íslenskan landbúnað – það er agenda RÚV og „góða fólksins“,“ segir Vigdís Hauksdóttir á Facebook-síðu sinni.
Vigdís hefur áður tjáð sig með umdeildum hætti þegar kemur að velferð dýra. Í viðtali við Fréttablaðið í fyrra kom fram að hún væri uppalin í sveit. „Ég átti góða sveitaæsku, tók þátt í öllum störfum og er rosalega fegin í dag að hafa alist upp í sveit og fengið að kynnast náttúrunni á þennan hátt. Ég er ekki síður glöð með það að hafa fengið að læra hvernig kaupin gerast á eyrinni varðandi dýrahald og ræktun bústofna og annað. Nú eru ofboðslega margir á Íslandi uppteknir af því að það sé eitthvert dýraníð í gangi í sveitum landsins. Ég hreinlega skil ekki þessa umræðu.“
Hún var þá spurð að því hvort hún ætti við svínabúin. „Ég kem frá sauðfjár- og kúabúi. Ég veit að íslenskir bændur gera sitt besta til að framleiða sem besta vöru og ég er fegin að hafa fengið að kynnast þessu í minni æsku.“