Hlutafé íslenska einkahlutafélagsins Costco Wholesale Iceland stendur í 6,2 milljörðum króna nú þegar um fjórir mánuðir eru í opnun verslunar bandaríska smásölurisans hér á landi.

Costco Wholesale Iceland er í eigu Costco Wholesale Corporation sem er með höfuðstöðvar í Washington-ríki í Bandaríkjunum. Félagið stefnir að opnun verslunar í Kauptúni í Garðabæ í mars en DV hefur áður fjallað um hlutafjáraukningu þess. Í frétt blaðsins í október kom fram að fyrirtækjaskrá Ríkisskattstjóra (RSK) hefði tveimur mánuðum áður borist tilkynning um að hlutaféð væri 3.490 milljónir króna.

Framkvæmdir við fjórtán þúsund fermetra verslun fyrirtækisins í Kauptúni eru í fullum gangi. Þegar ljósmyndara DV bar þar að garði í gær, mánudag, voru iðnaðarmenn að störfum á lóð fyrirtækisins. DV fjallaði í september um verðmat Hagfræðideildar Landsbankans á verslunarfyrirtækinu Högum. Kom þá fram að starfsmenn Landsbankans hefðu teiknað upp sviðsmynd sem gerði ráð fyrir að ársvelta Costco hér á landi verði nálægt því sem þekkist úr öðrum verslunum keðjunnar utan Ameríku eða um fjórtán milljarðar króna. Heildarvelta Costco í fyrra nam 14.000 milljörðum króna en það ár var íslenski smásölumarkaðurinn um 400 milljarðar króna.

Ath. fréttin var uppfærð 1. febrúar 2017.