Mjólkursamsalan og einkafjárfestar eru hluthafar í skyrsölufyrirtækinu Icelandic Provisions í Bandaríkjunum
Mjólkursamsalan (MS) og innlendir einkafjárfestar eru í hluthafahópi bandaríska fyrirtækisins Icelandic Provisions Inc. sem hóf síðasta vetur að selja íslenskt skyr vestanhafs. Skyrið kemur frá afurðastöð MS á Selfossi en framleiðsla Icelandic Provisions í Bandaríkjunum á að hefjast á fyrri hluta næsta árs. Skrifstofur fyrirtækisins eru í fjármálahverfi New York-borgar en fjárfestingarsjóðurinn Polaris Founders Capital í Boston kom ásamt MS að stofnun þess. Einar Sigurðsson, fyrrverandi forstjóri MS, er stjórnarformaður sölufyrirtækisins og hlutafjársöfnun þess, upp á um 11 milljónir dala eða 1,2 milljarða króna, stendur nú yfir.
MS á 18 prósenta hlut í Icelandic Provisions sem er með einkaleyfi á sölu á skyri íslenska samvinnufélagsins í Bandaríkjunum. Einar Sigurðsson hefur sagt við fjölmiðla þar í landi að vörurnar séu seldar í yfir 900 verslunum á austurströnd Bandaríkjanna. Um er að ræða skyr með sjö mismunandi bragðtegundum og í markaðssetningu fyrirtækisins eru saga íslenska skyrsins og MS mjög áberandi. Icelandic Provisions rekur starfsemi sína frá 19. hæð skýjakljúfs við Broadway í fjármálahverfi Manhattan.
„Við vorum búnir að vera inni á bandaríska markaðnum en fórum svo inn í þetta fyrirkomulag. Við ætlum okkur á fyrri hluta næsta árs að framleiða skyr í Bandaríkjunum í samstarfi við aðila þar. Það er mjög erfitt að ætla sér að þjónusta markaðinn þarna með flugi frá Íslandi. Við höfum aldrei selt jafn mikið skyr til Bandaríkjanna og á yfirstandandi ári og salan verður tvöföld miðað við árið í fyrra,“ segir Egill Sigurðsson, bóndi á Berustöðum í Ásahreppi og stjórnarformaður samvinnufélagsins Auðhumlu sem á 90 prósent í MS. Hin tíu prósentin eru í eigu Kaupfélags Skagfirðinga.
Sigurður Kjartan Hilmarsson stofnaði bandaríska fyrirtækið The Icelandic Milk and Skyr Corporation árið 2006 en það framleiðir skyr og aðrar mjólkurvörur undir nafninu Siggi’s. Skyrið er byggt á íslenskri uppskrift og var í árslok 2014 selt í yfir fjögur þúsund verslunum í Bandaríkjunum. Höfuðstöðvar Siggi’s eru einnig í New York. Þá stofnaði ljósmyndarinn Smári Ásmundsson fyrirtækið Smári-Organics í Kaliforníu á vesturströnd Bandaríkjanna árið 2010. Smári framleiðir jógúrt eftir íslenskri uppskrift.
Eigendur Icelandic Provisions hafa sótt um einkaleyfi á skyrdósum fyrirtækisins, sem eru tígullaga, og ýmsum slagorðum. Umsóknirnar eru einnig lagðar fram af bandaríska félaginu SkyrCo Inc. sem Egill segir hafa haldið utan um sölu á vörum MS í Bandaríkjunum áður en nýja félagið var stofnað.
„Við erum að reyna að aðgreina okkur á markaðnum og búa til vörumerki. Bæði innlendir og erlendir fjárfestar sjá verðmæti í tengingu við MS og söguna. Upphaflega var hönnunin með það markmið að dósirnar röðuðust betur á vörubrettum. Það er ákaflega dýrt að flytja þetta út með flugi og líka ótryggt því fraktin er alltaf víkjandi í öllu flugi,“ segir Egill.
Verðbréfafyrirtækið Virðing hefur verið ráðgjafi MS og Polaris Founders Capital við fjármögnun verkefnisins hér á landi. Hannes Frímann Hrólfsson, forstjóri Virðingar, segir að hlutafjársöfnuninni sé ekki lokið og stefnt sé að eiginfjárframlagi frá innlendum og erlendum fjárfestum upp tæpar 11 milljónir dala. Aðspurður vill hann ekki svara því hvaða innlendu fjárfestar hafa nú þegar skuldbundið sig verkefninu.
„Þeir hafa verið að bæta í hlutaféð en það er allt gert með þynningu á hinum 82 prósentunum sem MS á ekki. Hlutur okkar þynnist ekki út og okkar prósentutala verður föst fyrstu þrjú árin. Við höfum ekki lagt neina peninga í þetta heldur þekkingu, uppskriftir, tækniaðstoð og fleira og aðrir koma svo að því að fjármagna þetta með okkur,“ segir Egill. Ekki náðist í Einar Sigurðsson við vinnslu fréttarinnar.