Ekki einn einasti þingmaður í þingflokki Sjálfstæðismanna sem flýtti sér í gegnum nám
Myndband þar sem Áslaug Arna Sigurbjörnsdóttir, ritari Sjálfstæðisflokksins, útskýrir skólamál fyrir börnum á KrakkaRúv hefur vakið nokkra athygli. Sitt sýnist hverjum. Hrafn Jökulsson fullyrti á Facebook-síðu sinni að myndbandið væri „mögulega átakanlegasta framboðsræða seinni ára“ og spurði hvort að myndbandið væri „djók úr smiðju fjörkálfanna í VG?“. Taka fjölmargir undir þessa skoðun hans. Áslaug Arna er ritari Sjálfstæðisflokksins og einn af yngri frambjóðendum flokksins. Framganga hennar í sjónvarpssal í kosningabaráttunni hefur vakið athygli og margir haft á orði að hún hafi staðið sig með miklum sóma gegn reyndari stjórnmálamönnum. Það eru þó ekki allir sem eru hrifnir af Áslaugu.
.
Kennarinn Ragnar Þór Pétursson sakar Sjálfstæðismenn um hræsni í nýbirtum pistli á Stundinni.. Þar segir hann um myndbandið að það sé „hálf mínúta af fallegri hugsjón. Og hálf mínúta af skíðlogandi stórslysi. Snúið er út úr spurningu númer tvö og menntahugsjónin kristallast í lokaspurningunni þannig að maður þurfi að drífa sig í að hætta í skóla því nám sé barnaskapur og tímasóun enda sé heimurinn fullur af peningum,“ segir Ragnar.
Þar vísar hann í lokasvar Áslaugar Örnu um hvernig Sjálfstæðismenn sjá fyrir sér að breyta skólakerfinu. „Ég held að það sé nauðsynlegt að stytta tímann sem við erum í skólanum. Við erum búin að stytta hann um eitt ár. Ég held að við megum stytta hann um fleiri ár því heimurinn er fullur af fólki og peningum og allskonar en við eigum ekkert alveg nógan tíma og það er bæði gaman að vera barn en það er líka gaman að vera fullorðinn. Þannig að við þurfum að nýta tímann vel,“ segir Áslaug Arna.
Ragnar Þór grípur boltann á lofti og kannar námsferil allra þingmanna Sjálfstæðisflokksins. Niðurstaðan er athyglisverð.
„Þrátt fyrir meint dálæti Sjálfstæðismanna á því að flýta sér gegnum nám til að geta farið að umgangast fólk og peninga þá er ekki einn einasti þingmaður í þingflokk þeirra sem kaus þá leið fyrir sjálfan sig. Meira að segja ritari flokksins, sem hélt þessu fram, er enn að dunda sér við námið tæpum tveimur árum eftir að hún gæti verið búin,“ segir Ragnar