„Frambjóðendur Dögunar eru venjulegt fólk, bændur, sjómenn, kennarar, nemendur, læknar og lífeyrisþegar. Allt frambjóðendur sem vilja réttlátara samfélag. Það er hins vegar enginn fulltrúi skattaskjóla eða kúlulánþegi líkt og sumir aðrir flokkar bjóða almenningi upp á að kjósa.

Dögun vill þjóna almannahagsmunum en ekki sérhagsmunum. Til þess þarf ákveðið fólk með skýrar lausnamiðaðar leiðir. Við ætlum að afnema fátækt með öllum ráðum. Við viljum stofna samfélagsbanka – til að láta af bankaokrinu. Við viljum að fólk geti flutt að heiman fyrir fertugt og sé búið að greiða íverustaðinn áður en farið er á eftirlaun. Við viljum frjálsar krókaveiðar – til þess að standa vörð um sjávarbyggðirnar. Við viljum efla innviði samfélagsins, vegi, gagnaflutninga, menntun og heilbrigðisstofnanir. Við viljum berjast fyrir jafnrétti, því allir eiga rétt á jöfnum tækifærum og við viljum taka vel á móti fólki. Við vitum að náttúruvernd skilar hamingju og oftast fjárhagslegum ágóða einstaklinga og fyrirtækja. Við viljum engin leyndarmál og að 10% kjósenda geti farið fram á þjóðaratkvæðagreiðslu.

Ég trúi því að flest okkar viljum sjá raunverulegar breytingar á ríkjandi ástandi. Ég veit að í Dögun er dugmikið baráttufólkfólk. Við erum ekki fullkomin en við ætlum. Ég er tilbúin að vinna samviskusamlega fyrir fólkið í landinu.“

…

Íslendingar ganga að kjörborðinu á morgun og kjósa fulltrúa sína til Alþingis. Úr nægu er að velja fyrir kjósendur en níu stjórnmálahreyfingar bjóða fram í öllum kjördæmum landsins. Auk þess bjóða þrjár aðrar hreyfingar fram í færri kjördæmum.

DV leitaði til allra framboðanna og bauð þeim að reyna eftir megni að sannfæra kjósendur um að veita þeim atkvæði sín. Þetta eru þeirra áherslur.