Karlmaður gerði íbúum Vesturbæjarins lífið leitt í gærkvöldi
Lögreglan á höfuðborgarsvæðinu handtók karlmann á tólfta tímanum í gærkvöldi sem lét mjög ófriðlega fyrir utan hús í Vesturbænum.
Það var klukkan ellefu í gærkvöldi að tilkynnt var um mann í annarlegu ástandi og handtók lögregla karlmann skammt frá vettvangi. Þá hafði hann reynt að kveikja í bifreið sem stóð við húsið en lögreglumönnum tókst að slökkva eldinn. Að sögn lögreglu hafði maðurinn í hótunum við íbúa í fleiri húsum og lét mjög ófriðlega. Hann var vistaður í fangageymslu lögreglu vegna rannsóknar málsins.
Um svipað leyti var tilkynnt um heimilisofbeldi og líkamsárás í Austurbænum. Að sögn lögreglu var enginn handtekinn vegna málsins og litlir sem engir áverkar á þolanda. Nóttin var að öðru leyti tiltölulega róleg í umdæmi lögreglunnar á höfuðborgarsvæðinu. Tveir ökumenn voru stöðvaðuir vegna gruns um ölvun við akstur. Báðir ökumennirnir voru látnir lausir að lokinni blóðtöku.