„Reykjavík er hreint út sagt ljót borg sem er umvafin fallegri náttúru“. Á þessum orðum hefst grein danska rithöfundarins og blaðamannsins Carsten Jensen sem birtist í sænska dagblaðinu Dagens Nyheter í gær. Í inngangi greinarinnar segir Jansen að þau örfáu hús, sem gætu haft sögulegt gildi og eigin karakter, hverfi í skuggann af smekklausum búðargluggum. Aðrar byggingar séu líkt og afleiðing þess að teningi hafi verið kastað og einu möguleikarnir hafi verið „steypugrátt“ eða fjöldframleiddar nýtískubyggingar. „Hér, eins og á mörgum öðrum stöðum á jarðkringlunni, er líkt og skipulagsfræðingar hafi ekki fengið sæti við teikniborðið,“ segir Jansen.

Í greininni hneykslast blaðamaðurinn á því að Íslendingar, sárir eftir efnahagshrunið, hafi litið á gos Eyjafjallajökuls sem „risastóra auglýsingaherferð“ fyrir landið og náttúru þess. „Síðan þá hefur vöxtur ferðaþjónustunnar verið óstöðvandi og bráðlega munu um 27 þúsund manns starfa í geiranum, sem er um 10% hinnar fámennu þjóðar,“ segir Jansen. Hann fullyrðir að vandamál Íslands séu þau að vel menntaðir Íslendingar finni sér ekki störf við hæfi í uppsveiflunni sem nú gengur yfir og sæki því til Evrópu og Bandaríkjanna í leit að áskorunum. „Fyrir ungt fólk með háskólamenntun eru þjóðsögur og eldfjallagígar ekki vænleg framtíð,“ segir blaðamaðurinn.

Inntak greinarinnar er þó umfjöllun um hið gerbreytta pólitíska landslag sem allt stefnir í eftir komandi kosningar. Blaðamaðurinn lýsir því hvernig bylting hafi hafist eftir efnahagshrunið en hún hafi svo verið kæfð af núverandi ríkisstjórnarflokkum. Panama-skjölin hafi svo sprengt allt í loftið með þeim afleiðingum að boðað var fyrr en ella til kosninga og yfirvofandi er hrun ríkisstjórnarinnar.

Greinin í heild sinni: