Flugstjóri bandaríska flugfélagsins Delta var handtekinn í gærmorgun, hálftíma áður en hann átti að fljúga vél flugfélagsins frá flugvelli í Suður-Dakóta til Salt Lake City.
Flugstjórinn sem um ræðir, Russel Duszak, 38 ára, reyndist vera ölvaður. Var það starfsmaður flugvallarins sem tilkynnti hann til lögreglu eftir að hafa fundið áfengislykt af honum. Blóðsýnataka leiddi í ljós að Russel var sannarlega undir áhrifum áfengis.
Duszak hefur nú verið sendur í leyfi frá störfum meðan atvikið er rannsakað. Í frétt CBS News kemur fram að atvik af þessu tagi séu sem betur fer tiltölulega sjaldgæf. Á síðasta ári voru þó tíu flugmenn handteknir eftir að hafa flogið flugvélum undir áhrifum áfengis.
Og í ágúst síðastliðnum voru tveir flugmenn United Airlines handteknir vegna gruns um ölvun skömmu áður en þeir gengu um borð í vél sem þeir áttu að fljúga frá Skotlandi til New Jersey í Bandaríkjunum.