Sex af hverjum tíu hlynntir en aðeins fimmti hver á móti
Nærri lætur að sex af hverjum tíu Íslendingum séu hlynntir því að flokkar gefi upp hverjum þeir vilji helst vinna með í ríkisstjórn áður en gengið er til kosninga. Frá þessu greinir Maskína.
Píratar hafa verið í umræðunni undanfarnar vikur eftir að þeir buðu nokkrum flokkum til viðrænða um samstarf eftir komandi alþingiskosningar. Í könnun Maskínu kom fram að 57% eru hlynntir þessari leið en 19% andvígir. „Kjósendur Samfylkingar, Pírata og Vinstrihreyfingarinnar-græns framboðs eru einna helst hlynntir þessari hugmynd á meðan kjósendur Sjálfstæðisflokks og Framsóknarflokks eru einna helst andvígir henni. Þetta er afgerandi niðurstaða en kemur kannski ekki á óvart,“ segir á vef Maskínu.
Svarendur voru 836 talsins, koma úr Þjóðgátt Maskínu. Könnunin fór fram dagana 21.- 27. október.