Velta Iceland Pelagic lækkaði um 9,6 milljarða í fyrra – „Verður áfram erfitt“
Tekjur Iceland Pelagic, sölufyrirtækis útgerðarfélaganna Skinneyjar-Þinganess og Ísfélags Vestmannaeyja, lækkuðu um 9,6 milljarða króna í fyrra miðað við árið á undan. Fyrirtækið seldi þá sjávarafurðir fyrir 14,3 milljarða en samdráttinn má að miklu leyti rekja til efnahagsmála í Rússlandi og viðskiptabannsins sem ráðamenn þar settu á vörur frá Íslandi.
Iceland Pelagic var stærsti útflytjandi landsins á uppsjávartegundum til Rússlands og Hermann Stefánsson, framkvæmdastjóri fyrirtækisins, segir það hafa þurft að afskrifa „stórar upphæðir“ vegna krafna þar í landi. Vill hann ekki svara því hvort afskriftirnar hafi numið hundruðum eða þúsundum milljóna.
„Við eigum enn kröfur eða erum búnir að tapa þeim hvernig sem litið er á það. Þegar fór að þrengja að efnahagsástandinu í Rússlandi töpuðum við miklu og líklega mestu þar sem við vorum stærstir. Ég get ekki sagt hversu miklu, svona opinberlega, en það voru stórar upphæðir,“ segir Hermann.
Iceland Pelagic hafði í árslok 2014 selt sjávarafurðir fyrir 23,8 milljarða króna á árinu. Nokkrum vikum áður en reikningsárinu lauk eða um miðjan desember var útlit fyrir að útflutningur á íslenskum sjávarafurðum til Rússlands stöðvaðist vegna versnandi efnahagsástands þar í landi. Óvissa var um framhaldið og hvort fiskútflytjendur fengju greitt fyrir vörur sem voru farnar frá landinu. Þeir seldu þá mikið af uppsjávarfiski, eins og makríl, síld og loðnu, til rússneskra fyrirtækja en viðskiptin námu alls sextán milljörðum króna árið 2013.
Hermann Stefánsson sagði í samtali við Fréttablaðið í desember 2014 að rússnesk fyrirtæki skulduðu fiskútflytjendum á bilinu þrjá til fimm milljarða króna fyrir fisk sem hafði þá verið afhentur. Stærsti hluti viðskiptanna hafi verið í opnum reikningi þar sem Rússarnir fengu vörur án þess að búið væri að greiða fyrir þær. Átta mánuðum síðar settu Rússar viðskiptabann á íslenskar sjávarafurðir sem er enn í gildi.
„Gengisbreytingar höfðu að einhverju leyti áhrif í fyrra en að eðlilegu leyti var það Rússlandsmarkaður sem hafði áhrif og lægra verð á öllum afurðum. Svo vorum við með minna magn sem skapast einnig að hluta til út af Rússlandi. Þetta má því að miklu leyti rekja til þess að við höfðum ekki Rússlandsmarkað,“ segir Hermann.
Sölufyrirtækið var rekið með 174 milljóna króna tapi í fyrra og neikvæðri afkomu upp á 256 milljónir árið á undan. Samkvæmt nýbirtum ársreikningi var eigið fé þess, eignir mínus skuldir, jákvætt um 95 milljónir í árslok 2015. Skuldirnar námu þá 3,6 milljörðum króna en 5,4 milljörðum árið á undan. Í árslok 2014 átti félagið viðskiptakröfur upp á 3,2 milljarða en þær námu ári síðar 1,9 milljörðum. Aðrar skammtímakröfur lækkuðu úr 995 milljónum í 230 milljónir.
„Eftir að Rússland lokaðist höfum við verið að selja meira inn á Afríku og Asíu og aðra markaði sem við seldum á fyrir þann tíma. Loðnan fer svo í bræðslu því það er ekkert annað í boði þar. Þetta verður áfram erfitt og þá sérstaklega hvað snertir loðnuna. Ef við fáum að veiða hana er lítill markaður fyrir fiskinn og eiginlega bara Úkraína. Megnið af framleiðslunni undanfarinn áratug hefur farið á Rússland og það er enginn annar markaður þar en mjöl og lýsi. Iceland Pelagic selur ekki mjöl og lýsi og það sést því ekki í tölunum okkar.“
