„Síðan um miðbik áttunda áratugarins hefur þessi norræna þjóð rutt brautina þegar kemur að jafnrétti kynjanna og í dag eru stúlkur og konur á öllum aldri að njóta þeirra framfara sem hafa átt sér stað. En hvernig komust þær á þennan stað?“ spyr blaðamaður Guardian í nýlegri grein sem ber heitið „Ástæða þess að Ísland er besti staðurinn til að vera kona“ en auk greinarinnar er fjallað nánar um Ísland og jafnréttisbaráttuna í sjónvarpsþætti ITV í kvöld.

Blaðamaður ræðir til að mynda við Margréti Pálu Ólafsdóttur, framkvæmdastjóra Hjallastefnunnar og vekur athygli á skólastefnu leikskólans Laufásborgar í Reykjavík „Við þjálfum stelpurnar í að nota röddina. Við þjálfum þær í að byggja upp líkamlegan styrk. Við þjálfum þær í að sýna hugrekki,“ segir Margrét Pála.

Einnig er rætt við Þórdísi Lóu Þórhallsdóttur, forstjóra ferðaþjónustufyrirtækisins Gray Line sem segir Ísland góðan stað fyrir konur og Steiney Skúladóttur, meðlim rappsveitarinnar Reykjavíkurdætur sem segir íslenskar konur halda of mikið aftur af sér í launaviðræðum, og það sé ástæðan fyrir launamisrétti kynjanna. Þuríður Blær Jóhannsdóttir rappari tekur í sama streng: „Það er eins og við megum ekki bera borubrattar. Við eigum að vera hógværar.“

Viðmælendur greinarhöfundar virðast þó hafa verið sammála um að enn sé löng leið fyrir höndum í jafnréttisbaráttunni. „Ef þér er kennt frá barnsaldri að þú færð ekki það sem þér ber, ef þér er kennt að sitja og bíða, við hverju býstu þá?“ spyr Margrét Pála til að mynda.

Greinarhöfundur kemur jafnframt inn á að íslensk stjórnvöld hyggist afnema launamismun kynjanna áður en árið 2022 gengur í garð; á meðan séu íslenskar konur meðvitaðar um réttindi sín og það sem gengur á í samfélaginu – til að mynsa séu einn þriðju hluti íslensku kvenþjóðarinnar meðlimir í facebookhópnum Beauty tips- þar sem kynjatengd umræða skjóti reglulega upp kollinum.

„Sagan hefur kennt okkur að framfarirnar fæðast ekki út úr tóminu,“ ritar höfundur jafnframt og bætir við að þrýstingur frá grasrótinni auk fjárfestinga í stjórnmálum séu undanfari breytinga. Á Íslandi líti út fyrir að það sé bæði til staðar.