Ökumenn þurfa að fara að gát í umferðinni í morgunsárið enda er hálka víða á vegum landsins. Í tilkynningu frá Vegagerðinni kemur fram að hálka sé á Hellisheiði og hálkublettir í Þrengslum og einhver éljagangur.

Hálka og hálkublettir eru við ströndina og í uppsveitum á Suðurlandi. Hálkublettir eru einnig við Hafnarfjall og í Borgarfirði og hálka er á Holtavörðuheiði, Vatnaleið og Fróðárheiði en hálkublettir á Bröttubrekku sem og á einhverjum fjallvegum á Vestfjörðum. Hálka, krapi og éljagangur eru á Mývatns- og Möðrudalsöræfum. Hálkublettir eru á Vopnafjarðarheiði, Fjarðarheiði, Fagradal sem og á Oddsskarði.

Að sögn veðurfræðings á Veðurstofu Íslands frysti mjög víða á landinu í nótt. Hitinn mun hækka þegar líður á daginn þegar hitaskil ganga yfir landið með hvassri austanátt og rigningu, fyrst á Suður- og Vesturlandi en norðan heiða síðdegis.

„Í kvöld og nótt fylgir strekkings sunnanátt með skúrum, en á morgun tekur við vestanátt og kólnandi veður, og skúrirnar gætu orðið að slydduéljum þegar líður á daginn. Það er útlit fyrir nokkuð hvassa vestlæga átt og einhverja úrkomu í flestum landshlutum fram að helgi, en þá er útlitið heldur óræðara,“ segir í hugleiðingum veðurfræðings.