Guðrún Björk segir mikilvægt að brýna fyrir börnum sínum að keyra ekki undir áhrifum
Aðfaranótt föstudagsins 21. október létust þrjú ungmenni í umferðarslysi í Danmörku. Einn piltur lifði af og liggur alvarlega slasaður á sjúkrahúsi. Dætrum Guðrúnar Bjarkar, íslenskrar konu sem búsett er í Danmörku hafði verið boðið far með bílnum en þær afþökkuðu þar sem þær sáu að ökumaðurinn var undir áhrifum áfengis. Þær kvöddu vini sína og fóru heim með leigubíl. Hálftíma síðar keyra vinir þeirra á tré og þrír þeirra látast samstundis.
Guðrún Björk skrifaði færslu á Facebook á facebook sem hefur vakið mikla athygli og allir ættu að lesa. Þar brýnir hún fyrir foreldrum að segja börnum sínum að setjast ekki undir stýri undir áhrifum né setjast inn í bíl með ökumanni undir áhrifum. Guðrún segir í færslunni að hún hafi marg oft brýnt þetta fyrir dætrum sínum.
„Við fórum á slysstað í dag með rósir og kerti, þá skall meira og meira áfall hjá mér því ég get ekki hætt að hugsa um að þetta hefði getað verið dætur mínar, Guð minn góður ég er með þetta fast í huga mínum, HVAÐ EF ég hefði ekki verið búin að segja svona oft við þær í gegnum árin að EKKI setjast upp í bíl með drukknum ökumanni,“ skrifar Guðrún.