Héraðsdómur Reykjavíkur hefur sakfellt nítján ára karlmann fyrir líkamsárás sem framin var aðfaranótt 20. desember í fyrra. Maðurinn var ákærður fyrir að skalla annan mann í andlitið í Tryggvagötu í Reykjavík með þeim afleiðingum að fórnarlambið nefbrotnaði.
Maðurinn neitaði sök fyrir dómi og sagðist aðeins hafa ýtt við höfði fórnarlambsins með höfði sínu. Það hefði ekki verið fast. Dómurinn taldi það hafið yfir allan vafa að maðurinn hefði skallað brotaþola með þeim afleiðingum að hann nefbrotnaði.
Héraðsdómur dæmdi manninn í 60 daga fangelsi, skilorðsbundið til tveggja ára. Þá var honum gert að greiða brotaþola 180 þúsund krónur í skaðabætur og 585 þúsund krónur í sakarkostnað.