Telur að ríkið brjóti ákvæði stjórnarskrár með því að greiða sóknargjöld með innheimtum tekjuskatti
„Í morgun stefndi ég ríkinu.“ Á þessum orðum hefst stöðuuppfærsla Sindra Guðjónssonar fyrrverandi formanns Vantrúar á Facebook-síðu sinni. Með færslunni birtir hann mynd af undirritaðri stefnu sinni. Málið snýst um að Sindri, sem ekki á aðild að neinu skráðu trú- eða lífskoðunarfélagi, telur að fyrirkomulagið um að ríkið noti tekjuskatt, innheimtan meðal annars af honum sjálfum, til að greiða sóknargjöld þessara félaga brjóti í bága við ákvæði stjórnarskrá og sé í andstöðui við mannréttindareglur. „Þetta leiðir til þess að þeim sem hvorki tilheyra Þjóðkirkjunni né öðrum trú- eða lífsskoðunarfélögum er mismunað,“ segir Sindri.
Að hans mati getur það ekki staðist lög að allir greiði með þessum hætti félagsgjöld fyrir aðild að slíkum félögum án tillit til þess hvort að þeir séu skráðir í þau eða ekki.
„Ég veit til þess að einhverjir hafi leitað til umboðsmanns Alþingis vegna sambærilegra mála en ekki haft erindi sem erfiði. Þetta er hinsvegar í fyrsta sinn sem reynt er á málið fyrir dómstólum, segir Sindri. Málið verður þingfest fimmtudaginn 27.október í Héraðsdómi Reykjavíkur.
