Könnun Félagsvísindastofnunar fyrir Morgunblaðið
Píratar fengju fimmtán þingmenn kjörna og Sjálfstæðisflokkur fimmtán ef gengið yrði til kosninga í dag. Þetta er samkvæmt niðurstöðum könnunar á fylgi flokkanna sem Félagsvísindastofnun gerði fyrir Morgunblaðið dagana 14. til. 19. október.
Píratar eru með 22,6 prósenta fylgi en Sjálfstæðisflokkur 21,1 prósents fylgi. Vinstri grænir mælast með 18,6 prósenta fylgi og fengi samkvæmt því þrettán þingmenn kjörna. Þessir þrír flokkar bera höfuð og herðar yfir þá næstu. Framsókn kemur næst með 9,1 prósents fylgi og fengi flokkurinn samkvæmt því sex þingmenn. Viðreisn fengi einnig sex þingmenn en flokkurinn mælist með 8,8 prósenta fylgi.
Samfylkingin fengi fjóra þingmenn kjörna og mælist flokkurinn með 6,5 prósenta fylgi. Björt framtíð mælist með 6 prósenta fylgi og fengi einnig fjóra þingmenn. Aðrir flokkar, eins og Flokkur fólksins, sem mælist með 3,8 prósenta fylgi, næðu ekki manni inn á þing.
Könnunin var net- og símakönnun og var stærð úrtaksins 2.300 manns. Svarhlutfall var 59,4 prósent og þar af tóku 81,2 prósent afstöðu, að því er fram kemur í Morgunblaðinu í dag.