Stúlka á grunnskólaaldri hefur lagt fram kæru gegn Eiríki Fannari Traustasyni
Stúlka á grunnskólaaldri hefur lagt fram kæru gegn Eiríki Fannari Traustasyni, sem var dæmdur í fimm ára fangelsi í byrjun sumars fyrir hrottalega nauðgun í Hrísey sumarið 2015. Aðstandendur stúlkunnar sem og hún sjálf eru niðurbrotin vegna þess að Eiríkur Fannar gengur laus en honum var í lok september veitt tímabundið leyfi frá afplánun af mannúðarástæðum.
Engum, og þar á meðal Arnbjörgu Sigurðardóttur, réttargæslumanni stúlkunnar og konunnar sem Eiríkur var sakfelldur fyrir að hafa nauðgað, var tilkynnt sérstaklega um að Eiríkur væri kominn tímabundið á götuna.
Daníel Guðjónsson, yfirlögregluþjónn hjá lögreglustjóranum á Norðurlandi eystra, segir að Fangelsismálastofnun beri engin lagaleg skylda til að tilkynna hvort einstaka fangar séu í leyfi.
Stúlkan kærði Eirík Fannar fyrir kynferðisbrot. Þá hefur komið fram að meint brot hafi átt sér stað í Hrísey árið 2015.
Málið er nú á borði héraðssaksóknara Reykjavíkur en stúlkan kærði málið í sumar hjá Lögreglustjóranum á Norðurlandi eystra.
Barnavernd og Barnahús hafa sömuleiðis komið að málinu. Rannsókn málsins er lokið og nú bíða stúlkan og fjölskylda hennar eftir fregnum þess efnis hvort formleg ákæra verði gefin út í málinu.
Náinn aðstandandi stúlkunnar segir í samtali við DV að meint brot hafi falið í sér að stúlkan hafi verið misnotuð kynferðislega yfir nokkurra mánaða tímabil fyrri hluta árs 2015.
Hún hafi tekið fréttunum um að Eiríkur Fannar gangi laus mjög illa og þau eigi erfitt með að skilja af hverju hann hafi yfirhöfuð fengið leyfi.
„Hún er búin að loka sig af og grúfir sig bara ofan í sængina. Þetta var mikið áfall fyrir okkur öll.“
Líkt og áður hefur komið fram hefur það vakið töluverða undrun og reiði meðal almennings að Eiríkur Fannar gangi laus.
Líkt og áður hefur komið fram er ástæða leyfisins alvarleg veikindi í fjölskyldu Eiríks en hann eignaðist nýverið tvíbura, sem fæddust töluvert fyrir tímann, en annar drengurinn hefur verið lífshættulega veikur frá fæðingu en báðir dvelja á vökudeild Landspítalans við Hringbraut.
Í 61.gr laga um fullnustu refsinga kemur meðal annars fram að forstöðumaður fangelsis geti að fengnu samþykki Fangelsismálastofnunar veitt fanga skammtímaleyfi til dvalar utan fangelsis í þeim tilgangi að heimsækja náinn ættingja eða annan nákominn í fjölskyldu fanga sem er alvarlega sjúkur að fengnu samþykki viðkomandi eða hans nánasta aðstandanda
Einnig getur fangi fengið leyfi til að vera viðstaddur fæðingu, skírn eða fermingu barns síns eða til að gæta sérstaklega brýnna persónulegra hagsmuna sinna.
Jafnframt kemur fram að slíkt leyfi skuli vera átta klukkustundir að hámarki, en lengja megi þann tíma ef sérstækar aðstæður séu fyrir hendi. Þó skulu skammtímaleyfi aldrei vera lengri en nauðsyn krefur.
Ekki náðist í Pál Winkel fangelsismálastjóra við vinnslu fréttarinnar, þrátt fyrir ítrekaðar tilraunir.
Uppfært
DV hefur fyrir því heimildir að Eiríkur Fannar hafi ekki fengið skammtímaleyfi frá fangelsisvist sinni heldur sé hann í hléi frá afplánun. Í 19. grein laga um fullnustu refsinga er fjallað um hlé á afplánun. Þar segir að afplánun skuli vera samfelld. Þó sé heimilt að gera hlé á afplánun ef mjög sérstakar ástæður mæli með því. Hlé á afplánun skal bundið skilyrði um að aðili gerist ekki brotlegur meðan á því stendur og heimilt er að setja frekari skilyrði fyrir hléi á afplánun.