Keðjureykandi simpansi er þessa daga aðalstjarnan í dýragarðinum í Pyongyang í Norður Kóreu. Hinn 19 ára Azalea reykir rúmlega pakka á dag og hefur komist upp á lagið með að kveikja sér sjálf í sígarettu, hvort sem það er með kveikjara eða annarri logandi rettu.
Blaðamenn AP sem heimsóttu dýragarðinn á dögunum fylgdust með gestum dýragarðins standa hjá og hlæja á meðan þjálfari Azaleu henti til hennar kveikjara og hvatti hana til að kveikja sér í auk þess sem hann lét hana snerta á sér nefið, dansa og hneigja sig.
Dýraverndunarsinnar eru ekki par sáttir vog gagnrýnir fulltrúi ALDF dýragarðinn harðlega fyrir að þjálfa frumskógardýr í hegðun sem er þeim ónáttúruleg. Hafa forsvarsmenn dýragarðsins svarað gagnrýninni og fullyrða að Azalea andi ekki inn reyknum.
Umræddur dýragarður hefur gengist undir miklar endurbætur undanfarin misseri með það fyrir augum að gera hann nútímalegri og auka aðsókn. Fyrir utan Azaleu má einnig finna þar apa sem spilar körfubolta og hunda sem látnir eru líta út fyrir að kunna einfalsa samalagninu og frádrátt.
Garðurinn hefur áður sætt gagnrýni fyrir slæma meðferð á dýrum. Þannig segir í nýlegri grein Lonely Planet að dýrin hafi virst vansæl og vanrækt og þá hafa notendur Tripadvisor einnig margir hverjir gagnrýnt bágar aðstæður dýranna.