„Orðinn helber lúxus sem fáir veita sér“
„Þetta er orðinn helber lúxus sem fáir veita sér nema ef einhver annar er tilbúinn að borga, oftast atvinnurekandi eða sjúkratryggingar,“ segir Unnar Erlingsson íbúi á Egilstöðum í pistli sem birtist á vef Austurfréttar. Hann segir fjölskyldu sína hætta að nýta sér þjónustu Flugfélags Íslands þar sem verðið sé komið yfir öll velsæmismörk.
Unnar bendir á að fjölskylda hans hafi aldrei komið í heimsókn með flugi í þau 11 ár sem hann hefur verið búsettur á austurlandi, heldur kjósi frekar að sitja í bíl í 18 klukkutíma.
„Hin hliðin á þeirri staðreynd, og það sem flestum þykir eðlileg skýring, er að þau vilja frekar fljúga eitthvað út í heim fyrir sama pening. Jafnvel dvelja á Spáni í vikutíma á hóteli með flugi fyrir sömu upphæð. Það er eitthvað mjög bogið við þetta.“
Unnar kveðst einnig fyrir þessari miklu verðlagningu sem atvinnurekandi, en sökum kostnaðarins við flugsamgöngur reynist erfitt að fá fólk í vinnu.
„Fjarlægðin er nefnilega ekki bara um 1300 kílómetrar, heldur miklu frekar þær 50 þúsund krónur sem það kostar einstakling, eða um 150 þúsund krónur fyrir fjögurra manna fjölskyldu, að skreppa til Reykjavíkur.
Nú eða tveir vinnudagar í akstri sem bætast við eldsneytis og rekstrarkostnað bifreiðar,“
ritar Unnar jafnframt og bendir á að á meðan á tugum milljarða sé varið í uppbyggingu Keflavíkurflugvallar, sem síðan skilar sér í auknu framboði og lægra verði á erlendum flugleiðum, þá þurfi einstaklingar oft að borga helmingi fyrir flug til Reykjavíkur heldur en til útlanda.