Stúlka á grunnskólaaldri kærir Eirík Fannar fyrir ítrekuð brot
Stúlka á grunnskólaaldri hefur lagt fram kæru gegn Eiríki Fannari Traustasyni, sem var dæmdur í fimm ára fangelsi í byrjun sumars fyrir hrottalega nauðgun í Hrísey sumarið 2015.
Stúlkan, sem er fædd árið 2001, kærði Eirík Fannar fyrir kynferðisbrot. Meint brot áttu sér stað yfir nokkurra mánaða tímabil árið 2015. Á vef RÚV segir að meint brot Eiríks Fannars gegn stúlkunni hafi einnig átt sér stað í Hrísey.
Málið er nú á borði héraðssaksóknara Reykjavíkur en stúlkan kærði málið hjá Lögreglustjóranum á Norðurlandi eystra í sumar. Barnavernd og Barnahús hafa sömuleiðis komið að málinu. Ekki liggur enn fyrir hvort formleg ákæra verður gefin út í málinu.
Það vakti mikla athygli í gær þegar það spurðist út að Eiríkur Fannar hefði fengið tímabundið leyfi frá afplánun í mannúðarskyni og gangi nú laus án eftirlits. Ástæða leyfisins eru alvarleg veikindi í fjölskyldu Eiríks, líkt og fram kom í frétt DV um málið í gær.
Eiríkur og unnusta hans eignuðst tvíburadrengi í lok september. Drengirnir komu í heiminn 9 vikum fyrir tímann og var annar tvíburinn í bráðri lífshættu. Í byrjun þessa mánaðar var drengurinn búinn að braggast nokkuð og er nú úr lífshættu. Hefur fjölskyldan eytt öllum sínum tíma á vökudeild Landspítalans frá því að tvíburarnir komu í heiminn.
Arnbjörg Sigurðardóttir, skipaður réttargæslumaður stúlkunnar, vill ekki tjá sig um málið að svo stöddu. Arnbjörg var einnig réttargæslumaður frönsku konunnar sem Eiríkur Fannar var dæmdur fyrir að hafa nauðgað árið 2015.
Ekki náðist samband við Fangelsismálastofnun við vinnslu fréttarinnar.
