Félagið Einir á 2,76 prósenta hlut í tryggingafélaginu
Fjárfestingafélag í eigu Einars Arnar Ólafssonar, fyrrverandi forstjóra Skeljungs, stækkaði eignarhlut sinn í Tryggingamiðstöðinni (TM) í síðustu viku og á núna 2,76% hlut í tryggingafélaginu. Miðað við gengi bréfa TM í lok viðskipta í gær, mánudag, er markaðsvirði eignarhlutarins um 490 milljónir króna.
Eins og greint var frá í DV síðastliðinn föstudag byrjaði Einar Örn að kaupa bréf í TM fyrir nokkrum vikum í gegnum félagið Einir ehf., áður Einarsmelur, og átti það samtals 2,05% hlut samkvæmt hluthafalista tryggingafélagsins sem var birtur 6. október. Hann jók sem fyrr segir enn við eignarhlut sinn í TM í liðinni viku – um ríflega 0,7 prósentustig – sem þýðir að fjárfestingafélag hans er núna 9. stærsti hluthafi TM. Í samtali við DV sagði Einar Örn of snemmt að segja fyrir um hvort hann myndi byggja upp stærri stöðu í TM á næstunni, meðal annars í því skyni að sækjast eftir sæti í stjórn félagsins á aðalfundi á næsta ári, en á þessari stundu væru engin slík áform uppi.
Stærstu hluthafar TM eru Lífeyrissjóður verslunarmanna, Gildi lífeyrissjóður og hlutabréfasjóður í rekstri sjóðastýringarfyrirtækisins Stefnis. Þá á Helgafell ehf. og F eignarhaldsfélag, sem eru í jafnri eigu Bjargar Fenger, Ara Fenger og Kristínar Fenger Vermundsdóttur, ríflega 6% hlut sem þýðir að félögin eru stærsti einkafjárfestirinn í hluthafahópi TM. Sá sem stýrir fjárfestingum félaganna er Jón Sigurðsson, fyrrverandi forstjóri FL Group og eiginmaður Bjargar. Aðrir umsvifamiklir einkafjárfestar á meðal eigenda tryggingafyrirtækisins eru, fyrir utan fjárfestingafélag Einars Arnar, félögin Riverside Capital ehf., sem er í eigu Örvars Kærnested fjárfestis, með 2,63% hlut og Þrír GAP ehf., sem er í eigu Kjartans Gunnarssonar, fyrrverandi framkvæmdastjóra Sjálfstæðisflokksins, með 2,15% hlut. Örvar er jafnframt stjórnarformaður TM.