Benedikt Jóhannessyni svíður ummæli Láru Hönnu Einarsdóttur
„Ég er örugglega of viðkvæmur, en verð samt að viðurkenna að mér finnst leiðinlegt þegar Lára Hanna Einarsdóttir vinkona mín kallar mig mellu og fjölmargir vinir mínir láta í ljós velþóknun á Facebook.“
Þetta skrifar Benedikt Jóhannesson, formaður Viðreisnar, á Facebook. Hann segir að með færslu hennar fylgi alls kyns útlistanir á skilyrðum Pírata og hve ómerkilegt sé að gangast ekki undir þau. Umræðuefnið er fundarboð sem Píratar hafa sent VG, Samfylkingunni, Bjartri framtíð og Viðreisn, til að ræða mögulegt samstarf að loknum kosningum.
Lára Hanna skorar á Facebook á Benedikt og Óttar Proppé, formann Bjartrar framtíðar, að endurskoða viðhorf sín til fundarboðsins. Hún segist forviða yfir viðbrögðum þeirra sem finnst yfirlýsing Pírata ekki góð, eða ólýðræðisleg. „Að öðrum kosti mun þorri kjósenda – vona ég – líta á ykkur sem mellur íslenskra stjórnmála. Opnir fyrir öllu, líka spillingunni. Sorrí, strákar – þannig er það bara,“ skrifar hún.
Benedikt bendir á að bréfið sem hann hafi fengið fjalli ekki um stjórnarmyndum, „ekkert um skilyrði, ekkert um að kalla flokka saman, ekkert um hverja á ekki að tala við.“ Hann deilir auk þess mynd af bréfinu. „Eigum við ekki öll að hefja umræðuna upp á aðeins hærra plan?“