Frá og með sunnudeginum verður farþegum, sem fljúga með erlendu flugfélögunum Qantas Jetstar, Tigerair og Virgin Australia, meinað um að hafa með sér Samsung Galaxy Note 7 síma um borð. Ástæðan er möguleg íkveikjuhætta. Borið hefur á að kvikni í rafhlöðum Galaxy Note 7 og hefur framleiðandi símanna kallað inn um 2,5 milljónir símtækja. Þessu greinir fréttaveita The Guardian frá á vefsíðu sinni.

Mynd: Reuters

Þá verður algerlega bannað að fara með símana um borð í allar vélar flugfélaganna, hvort sem slökkt er á símanum eða honum pakkað niður í handfarangur. Áður leyfðu flugfélögin símana um borð, væri slökkt á þeim. Öryggisráð flugfélaganna íhugar að leggja blátt bann við símunum fyrir öll flugfélög í Ástralíu. Peter Gibson, talsmaður ráðsins segir: „Ef við þurfum að aðhafast frekar um þetta mál þá munum við gera það, en að svo stöddu höfum við ekki enn bannað þá algerlega.“

Á föstudaginn gaf ferðamálastofnun Bandaríkjanna út neyðarbann gegn Galaxy Note 7 í öllum flugum til og frá landinu. „Bannið á við um öll símtæki hvort sem er í handfarangri eða innrituðum farangri,“ greinir Quantas frá. „Notkun Samsung Galaxy Note 7 er nú stranglega bönnuð í öllum flugum Virgin Australia og Tigerair Australia og algera bannið sem tilkynnt var í dag er auka neyðarúrræði,“ segir Virgin Australia.

Á þriðjudag tilkynnti Samsung að fyrirtækið hygðist hætta framleiðslu á Note 7, eftir að uppfærðar útgáfur af símunum ofhitnuðu einnig.