Akureyrarbær seldi 16,3 prósenta hlut sinn í fjárfestingarfélaginu Tækifæri hf. til fjárfestingarfélagsins KEA svf. í lokuðu söluferli fyrr á þessu ári. Sveitarfélagið fékk 120 milljónir fyrir bréfin og sakar Sigurður Guðmundsson, fyrrverandi bæjarfulltrúi A-listans, bæjarráð um dómgreindarleysi og spillingu.

Sigurður gagnrýndi ákvörðunina í Facebook-pistli síðasta föstudag. Benti hann þar á að bókfært virði hlutarins var 144 milljónir og að Tækifæri hefði skilað 384 milljóna króna hagnaði árið 2015. Verðmætasta eign félagsins er 41% prósents hlutur í Baðfélagi Mývatnssveitar sem rekur Jarðböðin við Mývatn. Þau voru rekin með 238 milljóna hagnaði í fyrra.

Oddvitar Framsóknarflokks, Samfylkingar og L-lista á Akureyri höfnuðu ásökunum Sigurðar í yfirlýsingu á föstudagskvöld. Málið verður tekið fyrir í bæjarráði á fimmtudag en líkt og kom fram í frétt RÚV í gær, mánudag, var salan færð í trúnaðarbók bæjarráðs. Óskað hefur verið eftir að endurskoðandi bæjarins fari yfir málið.