Talsvert hefur dregið úr skjálftavirkni við Kötlu í nótt. Frá miðnætti hafa einungis mælst 23 skjálftar, sem hafa komið sjálfvirkt inn á mæla Veðurstofu Íslands, mælst á svæðinu.

Sex skjálftar urðu á hálftíma tímabili um klukkan eitt í nótt. Stærsti skjálftinn það sem af er degi, var af stærðinni 2,7 en hann varð klukkan rétt rúmlega þrjú í nótt.

„Þetta er búið að róast heilmikið og líkt og áður er enginn gosórói mælanlegur.“ Þetta segir Hulda Rós Helgadóttir, náttúruvársérfræðingur á Veðurstofu Íslands í samtali við DV í morgun.

Líkt og áður segir hafa aðeins mælst um 23 skjálftar í nótt og í morgun en í gær voru þeir rúmlega 200.

„Þetta hefur komið í kviðum. Síðasta stóra kviðan var í hádeginu í gær en í framhaldinu var ákveðið að færa litakóða fyrir flugumferð á gult sem þýðir að mikil virkni sé í eldstöðinni. Þá ákvað vísindaráð að setja óvissuástand fyrir svæðið. Þetta er enn í fullu gildi,“ segir Hulda Rós.

Ekki hefur verið tekin ákvörðun um hvort og þá hvenær dregið verði úr varúðarráðstöfunum á svæðinu umhverfis Kötlu.

Hulda segir að það verði metið um helgina og líklega muni vísindaráð sem og sérfræðingar Veðurstofunnar funda aftur á mánudaginn.

„Við ætlum að sjá hvort það komi eitthvað meira og fylgjumst grannt með hvernig þetta þróast.“