Krufningarskýrsla Darrens Rainey gerir allt vitlaust
Niðurstaða líkskoðunar á fanganum Darren Rainey, sem sat inni fyrir vörslu kókaíns, er að slys hafi orðið til þess að hann lét lífið í Miami-Dade-fangelsinu í Bandaríkjunum. Raunin er sú að Rainey var læstur inni í sjóðheitri sturtu í tvær klukkustundir – þrátt fyrir að hann hafi beðist vægðar og öskrað af lífs- og sálarkröftum. Tilraunir til endurlífgunar báru engan árangur en húð hans var orðin laus á líkamanum vegna hitans.
Í krufningarskýrslu, útgefinni af fangelsinu, segir að dánarörsok mannsins, sem glímdi við andleg veikindi og lést árið 2012, hafi verið sambland af geðrofi, hjartasjúkdómi og innilokun [e.confinment]. Frá þessu greinir Miami Herald.
Vatnið í sturtunni var að sögn 39 gráðu heitt og yfirstjórn fangelsisins fullyrðir að aldrei hafi staðið til að vinna manninum mein, þó að honum hafi verið haldið undir rennandi vatninu í tvær klukkustundir. Þeir segja að í aðdraganda sturtunnar hafi hann haft hægðir á gólf fangaklefans.
Skýrslan kom út í vikunni en hefur ekki verið gerð opinber þar sem yfirstandandi er sakamálarannsókn vegna dauða Reineys. Málið hefur vakið hörð viðbrögð vestanhafs og talað er um að það geti orðið til þess að gangskör verði gerð í meðferð á föngum í fangelsum Florida-fylkis.