Jakob hættir sem forstjóri Straums

Horfið frá því að sameinaður banki Straums og MP banka verði með tvo forstjóra

Jakob Ásmundsson.
Hættir sem forstjóri Jakob Ásmundsson.

Samkomulag hefur náðst um að Jakob Ásmundsson hætti sem forstjóri Straums fjárfestingabanka. Fram kemur í fréttatilkynningu frá bankanum að samkomulagið sé gert að beiðni Jakobs en hann hefur starfað hjá bankanum í tíu ár, fyrst sem framkvæmdastjóri og síðustu tvö ár í forstjórastóli.

Í tilkynningunni er Jakobi færðar bestu þakkir fyrir framlag hans til bankans, „ekki síst á undanförnum misserum í aðdraganda þeirrar sameiningar við MP banka sem nú er framundan.“ Jakob mun láta af störfum þegar því sameiningarferli verður formlega lokið.

Þá er haft eftir Jakobi í fréttatilkynningunni að hann hafi á sínum tíma tekið þátt í stofnun Straums og hafi hann upplifað bæði „súra tíma og sæta“ með bankanum. „Ég hef lengi verið sannfærður um að eðlilegt væri að styrkja stöðu bankans með ytri vexti. Kaup Straums á ráðandi hlut í Íslenskum verðbréfum og stórum hlut í MP banka voru liður í undirbúningi þess samruna sem nú er framundan. Sameinaður banki mun hafa mikið afl, meðal annars vegna sterkrar stöðu ÍV á eignastýringarmarkaði. Fyrir vikið tel ég fjölmörg sóknarfæri framundan. Hins vegar hef ég frá upphafi talið það betra að hafa einn forstjóra í stafni bankans en ekki tvo. Þess vegna kýs ég að stíga til hliðar á þessum tímamótum og óska ég bæði samstarfsfólki mínu í Straumi og starfsfólki og stjórn sameinaðs banka alls hins besta.“

DV upplýsti um það í undir lok janúar á þessu ári að lagt væri upp með að Sigurður Atli Jónsson, forstjóri MP banka, og Jakob yrðu báðir áfram sem forstjórar í sameinuðu félagi. Ljóst er nú að ekkert verður af því en Jakob er í hópi stærstu hluthafa Straums með um 8,5% eignarhlut.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.