Birgitta Jónsdóttir, þingflokksformaður Pírata, segist hafa sannfært meðlimi Anonymous um að hætta netárásum á Ísland. Eins og greint hefur verið frá að undanförnu hefur Anonymous-hópurinn gert fjölmargar árásir á íslenskar vefsíður á undanförnum vikum vegna stuðnings Íslands við hvalveiðar.

Meðal þeirra vefsíðna sem hópurinn tók niður á dögunum má nefna mbl.is, visiticeland.com og heimasíður íslenskra ráðuneyta. Birgitta segir í umræðum á Pírataspjallinu á Facebook að hún hafi beitt sér fyrir því að þessum árásum yrði hætt.

„Anon eru margir ólíkir hópar sem þekkjast ekkert innbyrðis. Mér tókst að sannfæra dýravinahóp Anon um að hætta þessum árásum á Ísland í twitter spjalli um daginn, sagði þeim að þessar aðgerðir myndu hafa þveröfug áhrif en þau áhrif sem þau voru að kalla eftir. Svo virðist sem þau hafi tekið rökum,“ segir Birgitta í umræðum um Anonymous-hópinn sem Össur Skarphéðinsson, fyrrverandi utanríkisráðherra og núverandi þingmaður Samfylkingar var upphafsmaður að.