„Netið er alveg frekar klikkað"

Stony lýsti sigurgöngu sinni á netinu á ráðstefnu í Hörpu

Stony í Hörpu á fimmtudag.
Stony í Hörpu á fimmtudag.

„Ok, þetta er sem sagt auglýsing fyrir Pepsi og við ætlum að fá Messi, David Luiz, Van Persie og þig, ef þú ert til,” segir Þorstein Baldvinsson, betur þekktur sem Stony, þegar hann lýsir því þegar Pepsi fékk hann til liðs við sig til að leika í risaauglýsingu sem var byggð á myndbandi sem Stony hafði sett á netið.

Þetta kemur fram í heimildarmynd fyrir ráðstefnuna Sko sem haldin var í Hörpu síðastliðinn fimmtudag en þar rakti Stony hvernig netið skaut honum upp á stjörnuhimininn á skömmum tíma og kom honum í samband við alþjóðleg fyrirtæki og stórstjörnur.

Um 400 manns sóttu ráðstefnuna sem fjallaði um markaðsmál á netinu og hvernig íslensk fyrirtæki geti nýtt netið betur í markaðsstarfi sínu.

Stony var viðstaddur ráðstefnuna og hlaut dynjandi lófaklapp ráðstefnugesta eftir sýningu myndbandsins sem framkallaði gæsahúð margra viðstaddra.

Í heimildarmyndbandinu segir Þorsteinn Sindri Baldvinsson, betur þekktur sem Stony, frá því hvernig hann lærði að nota samfélagsmiðla á borð við Facebook, Twitter og YouTube, til að koma sér á framfæri. Hann deildi myndböndum af sér vera að tromma en sá fljótlega að hann yrði að gera eitthvað öðruvísi til þess að skera sig úr öðrum áþekkum myndböndum á netinu. Allt breyttist þegar hann gerði sína eigin útgáfu af þekktu lagi Macklemore, Can‘t Hold Us, þar sem hann notaði m.a. bílhurð, glös og örbylgjuofn til að búa til hljóðin og myndbandið sló í gegn.

Stony lýsti því svo hvernig honum leið þegar hann fékk skilaboð nokkrum dögum síðar frá sjónvarpsmanninum Ryan Seacrest og var flogið út með dags fyrirvara á fund með forsvarsmönnum Pepsi í New York þar sem myndbandið hans var leikið upp á stórum skjá. Eins og allir vita lék Stony síðan í auglýsingu fyrir Pepsi með fremstu fótboltamönnum heims. Allt vegna myndbands sem hann gerði á tveimur klukkustundum heima á Akureyri. Stony lauk máli sínu á að segja að þetta sýndi einfaldlega hvað „netið er klikkað“.

Þó að Stony hafi verið yngstur fyrirlesara á ráðstefnunni þá virtust menn á því að þessi orð ættu vel við og vitnuðu nokkrir fyrirlesaranna í orð Stony, um hvað netið væri nú einmitt dálítið klikkað.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.