Vilborg Arna er sísvöng

Maturinn í suðurpólsgöngunni er á þrotum

Suðurpólsfarinn Vilborg Arna Gissurardóttir kveðst stríða við hungurtilfinningu nú, þar sem hún leggur til atlögu við síðustu kílómetrana að lokatakmarki sínu. Hún er nú komin yfir á 88.breiddargráðu og á eftir að ganga um 220 km til að ná á pólinn, eða sem nemur vegalengdinni frá Akureyri til Vopnafjarðar. 

Aðstæður til pólgöngu hafa verið slæmar síðustu daga, mikill kuldi og hvassviðri sem myndað hefur það háa rifskafla að vanir pólfara segjast vart þekkja annað eins. Vilborg, sem þarf að hylja allt andlit sitt með grímu,  segir þessar aðstæður vera mikla áskorun fyrir sig og þrátt fyrir að hún sé lítillega kalin á lærum hefur henni aukist þróttur eftir því sem lokatakmarkið nálgast. Hún segist þó vera sísvöng enda er maturinn sem hún hefur haft meðferðis á þrotum.  Líkur eru á að hún þurfi að láta senda sér meiri vistir þar eð göngudagarnir verða væntanlega fleiri en hún gerði ráð fyrir.

Enn er á brattann að sækja því hækkunin sem eftir er nemur um 250 metrum. Nú eru 47 göngudagar að baki og miðað við yfirferð Vilborgar síðustu daga má ætla að hún komist á pólinn eftir um það bil viku.

Vilborg Arna er fyrsta íslenska konan til þess að þreyta göngu á suðurpólinn en hún safnar áheitum til styrktar Líf styrktarfélags Kvennadeildar Landspítalans – og geta heitið á hana í síma 908 1515 (1500 krónur) eða með frjálsum framlögum á vefsíðunni www.lifsspor.is en þar heldur hún einnig úti dagbók um ferð sína á pólinn.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.