Segja dóminn rangan og íhuga áfrýjun

Lögfræðingur Gunnlaugs M. Sigmundssonar og Sigríðar G. Sigurbjörnsdóttur hefur sent frá sér yfirlýsingu fyrir hönd umbjóðenda sinna í kjölfar þess að meiðyrðamál þeirra á hendur Teiti Atlasyni var vísað frá í Héraðsdómi fyrr í dag.

Í yfirlýsingunni segir að það sé nauðsynlegt að það komi fram „að það sé mat stefnenda að dómurinn sé rangur í veigamiklum atriðum og fullt tilefni sé til þess að íhuga áfrýjun.“

Í yfirlýsingunni segir að: „. Dómurinn kemur sér undan því að taka á þeirri grunnspurningu málsins hvort tilefnislaust netníð eins og það sem stefnendur hafa mátt þola af hálfu stefnda fái staðist lög. Frávísun aðalsakar stríðir gegn fyrri dómafordæmum Hæstaréttar í sambærilegum málum. Að auki fæst ekki staðist að sýkna í framhaldssök vegna atvika sem sannanlega áttu sér stað eftir að stefndi hafði sett umstefnd meiðandi ummæli á netið.“

Hjónin stefndu Teiti í mars í fyrra, fyrir skrif hans á bloggsíðu sína um Kögunarmálið en í skrifum sínum rifjaði hann upp umfjöllun Morgunblaðsins um Kögun.

Tvær kröfur voru gerðar í málinu. Annari kröfunni, sem bæði Gunnlaugur og eiginkona hans, gerðu á Teit var vísað frá dómnum en Teitur var sýknaður af hinni kröfunni. Auk þess voru hjónin dæmd til að greiða Teiti 1,5 milljónir króna í málskostnað.