Björn Zoëga fær ekki launahækkun

„Ég vona að með þessu móti skapist á ný friður á Landspítala“

Mynd: Mynd: Eyþór Árnason

Launahækkun Björns Zoëga hefur verið dregin til baka til að koma á sáttum innan Landspítalans.

Þetta kemur fram á vef Velferðarráðuneytisins. Björn er forstjóri Landspítalans og átti að fá fjögur hundruð þúsund króna launahækkun um næstu mánaðamót að óbreyttu eftir samkomulag sem hann gerði við Velferðarráðherra. Birni stóðu til boða störf erlendis og hafði tilkynnt velferðarráðherra um uppsögn sína. Í kjölfarið var samið við Björn um launahækkun.

Breytingarnar nú eru þó gerðar í samráði Guðbjarts Hannessonar og Björns en á vef Velferðarráðuneytisins segir Guðbjartur: „Samkomulagið við Björn um að gegna áfram forstjórastarfinu á Landspítalanum með auknu svigrúmi til að sinna læknisstörfum gerði ég í góðri trú þar sem ég taldi það þjóna best hagsmunum sjúkrahússins við núverandi aðstæður. Þetta mat reyndist ekki rétt og ég tel að umræður sem orðið hafa um málið opinberlega og viðbrögð starfsmanna og stéttarfélaga heilbrigðisstarfsfólks bendi til þess að engin sátt geti orðið um þessa ákvörðun.

Til að stuðla að sáttum í þágu Landspítala og þess mikilvæga starfs sem þar fer fram á hverjum degi var það sameiginleg niðurstaða okkar Björns að falla frá umræddu samkomulagi um breytt starfskjör. Hagsmunir Landspítalans verða að ganga fyrir eins og að var stefnt í upphafi.“

Á vef Landspítalans kemur einnig fram að Björn Zoëga hafi afþakkað kjarabreytinguna í ljósi þess mikla ósættis sem varð í kjölfar hennar: „Ég hef verið einlægur í því hlutverki að leiða öflugan hóp starfsmanna Landspítala á miklum niðurskurðartímum. Eftir þessu starfi hefur verið tekið erlendis og mér hafa staðið til boða nokkur störf við að stýra stórum sjúkrahúsum í Evrópu. Þegar ég tilkynnti velferðarráðherra að ég ætlaði að segja upp störfum bauð hann mér að bæta við mig skurðlækningum og fá greitt fyrir það aukna vinnuframlag. Ég samþykkti þetta og um leið gerði ég kröfu um enn meiri stuðning við hin ýmsu verkefni LSH. Það var samþykkt. Ég taldi að með þessu yrðu um leið auknar líkur á að auðveldara yrði fyrir heilbrigðisstarfsfólk að sækja kjarabætur á næstunni. Ég hafði rangt fyrir mér hvað þann þátt varðar. Ég vona að með þessu móti skapist á ný friður á Landspítala og við getum farið að einbeita okkur að því sem við gerum best, en það er að hugsa um sjúklinga á spítalanum.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.