Nemendur af landsbyggðinni fá ekki nemakort

„Foreldrar hafa hringt til okkar og kvartað undan þessu en auk þess eru nú að berast kvartanir frá foreldrum utan af landi vegna þess að nemendur utan af landi, sem sækja framhaldsskóla á höfuðborgarsvæðinu eiga þess ekki kost að kaupa nemakort. Ástæðan er sögð sú að sveitarfélagið taki ekki þátt í nemakortum,“ segir Hrefna Sigurjónsdóttir, framkvæmdastjóri landssamtaka foreldra, Heimili og skóli.

Nemakortið hækkaði um 8.000 krónur í ár en mesta hækkunin varð á seinasta ári, þegar kortið tvöfaldaðist í verði, úr 15.000 krónum upp í 30.000. Reynir Jónsson, framkvæmdastjóri Strætó BS, sagði við DV að tvær ástæður liggi að baki hækkuninni.

Var tilraunaverkefni

„Í fyrsta lagi þá var þetta þannig að árið 2007 var ákveðið að ráðast í tilraunaverkefni – sem var að gefa nemendum á framhaldsskólastigi frítt í strætó. Í kjölfarið á því var búist við stóraukinni notkun á strætó á meðal þessa hóps. En það gerðist ekki.“

Um 5.000 manns hafi verið að nýta sér nemakortið, sem hafi verið langt undir væntingum, sem voru að um helmingur nemenda myndi nýta sér tilboðið. Seinni ástæðan ku vera sú að sveitarfélögin hættu að niðurgreiða kortin.

Á skjön við röksemdir

Hrefna segir það skjóta skökku við að leyfa ekki nemendum af landsbyggðinni að kaupa nemakortin á þeim forsendum að sveitarfélögin þeirra taki ekki þátt í verkefninu, enda sé það ein aðalástæða þess að kortin hafi hækkað svona mikið í verði að sveitarfélögin hafi dregið sig úr verkefninu.

„Þessir samningar eru því væntanlega ekki í gildi eða munu brátt falla úr gildi. Þess fyrir utan er ósanngjarnt að nemendur sömu skóla sitji ekki við sama borð og er þar augljóslega ekki gætt meðalhófs, samanber meðalhófsreglu.“

“Ósanngjarnt“

„Nemendur utan af landi þurfa margir hverjir að fara úr sínu sveitarfélagi til að sækja skóla og ljóst er að stór hluti þeirra sækir sína framhaldsmenntun til höfuðborgarinnar. Mun dýrara er fyrir nemendur utan af landi að stunda nám þar sem þeir þurfa að flytja að heiman og ljóst er að þeir hafa ekki neina foreldra til að skutla sér og þurfa því jafnvel enn frekar á þjónustu Strætó að halda,“ segir Hrefna enn fremur.

Í raun má færa fyrir því rök að þeir þurfi einna mest á afslætti nemakorta að halda. Því er afar ósanngjarnt að þeir njóti ekki sömu afsláttarkjara og aðrir nemendur í sama skóla á sama svæði. Ljóst er að á meðan á skólaárinu stendur búa þeir að jafnaði á höfuðborgarsvæðinu – þar sem skólinn er staðsettur. Vonandi verður þessu breytt þannig að nemendur framhaldsskóla búi við raunverulegt jafnrétti til náms og að viðskiptavinum Strætó sé ekki mismunað.“