Innrás líkleg fyrir kosningar

Ráðist Ísraelar inn í Íran má vænta þess að árásirnar hefjist fyrir bandarísku forsetakosningarnar í nóvember. Ray McGovern, stjórnmálagreinandi og fyrrverandi starfsmaður CIA, leiðir að þessu líkum í grein á vefmiðlunum Confortium News og Alternet. Meðal heimildarmanna hans eru embættismenn í Washington sem telja ísraelskum stjórnvöldum liggja á að grípa til harkalegra aðgerða gegn Íran fyrir kosningarnar. Barack Obama hefur ekki stutt Ísraelsríki jafn eindregið og fyrirrennarar hans og talið er að Ísraelsmenn óttist að Obama verði enn tregari í taumi á seinna kjörtímabili sínu, verði hann endurkjörinn. Því sé æskilegast að ráðast strax inn í Íran sem fyrst og tryggja sér stuðning og jafnvel þátttöku Bandaríkjanna.

Undanfarið hafa ísraelsk dagblöð greint frá vísbendingum um að kjarnorkuáætlun Írana sé mun lengra komin en áður var talið. Takist Írönum að koma sér upp kjarnorkuvopnum hefði það í för með sér verulegar breytingar á valdajafnvæginu í Mið-Austurlöndum. Ísraelar óttast þetta og hefur Benjamin Netanjahu, forsætisráðherra Ísraels, margoft lýst því yfir að Ísraelum standi ógn af kjarnorkuáformunum. Yfirmenn í her Atlantshafsbandalagsins hafa þó varað við afleiðingum þess að ráðast inn í Íran, enda geti átökin þá breiðst út um Mið-Austurlönd.

Því hefur verið haldið fram að Bandaríkjunum stafi fremur efnahagsleg en hernaðarleg ógn af írönskum stjórnvöldum. Þau hafa tekið forystu á sviði olíuviðskipta í öðrum gjaldmiðlum en Bandaríkjadollar sem hefur verið nær einráður á olíumarkaðnum í hálfa öld. Barack Obama þykir þó ólíklegur til að taka þátt í árásunum á Íran. Vænta má að ísraelsk stjórnvöld renni hýru auga til Mitt Romneys sem gagnrýnt hefur Obama fyrir ónægan stuðning við Ísraelsríki.