Í miðri Karakum-eyðimörkinni í Túrkmenistan, einni stærstu eyðimörk heims, er að finna gríðarstóran gíg sem í hefur logað undanfarin 40 ár. Það er ekki að ósekju að heimamenn kalla gíginn „dyrnar til helvítis“ ef marka má meðfylgjandi myndir sem birtust á dögunum í breska blaðinu The Daily Mail.
Vítislogarnir voru kveiktir árið 1971 þegar hópur sovéskra vísindamanna vann við boranir á svæðinu. Svæðið sem gígurinn er á heitir Darvaza og er afar ríkt af vinnanlegu gasi og það var einmitt markmið vísindamannanna; að kanna hvort undir yfirborðinu leyndist mikið magn af vinnanlegu gasi.
Gasið brennur enn
Áætlanir vísindamannanna fóru þó út um þúfur þegar jarðvegurinn undir rannsóknarsvæðinu féll saman. Þungur borturn sem vísindamenn notuðust við og hellir, stútfullur af gasi, gerðu það að verkum að jarðfall varð og gígurinn myndaðist. Í kjölfarið streymdi gas út í andrúmsloftið og ákváðu vísindamennirnir að brenna það til að það myndi ekki valda fólki skaða. Það sem vísindamennirnir áttuðu sig ekki á var hversu mikið af gasi var á svæðinu. Töldu þeir að gasið myndi brenna upp á nokkrum dögum en raunin varð önnur. Nú, rúmum 40 árum síðar, loga eldar enn í gígnum sem er 70 metrar á breidd og 20 metrar á dýpt.
Lofaði öllu fögru
Gígurinn er 260 kílómetra norður af höfuðborg Túrkmenistans, Ashgabat. Árið 2010 heimsótti forseti landsins, Gurbanguly Berdimuhamedow, svæðið og lofaði hann að holunni yrði lokað og eldarnir slökktir. Þrátt fyrir fögur fyrirheit stendur holan enn opin og mun líklega gera það áfram.
Blóðugt uppgjör í Seljahverfi
Alþingiskosningar 2013