Svavar Halldórsson, eiginmaður Þóru Arnórsdóttur forsetaframbjóðanda, sendi Hannesi Hólmsteini Gissurarsyni tölvupóst í nótt þar sem hann spurði hvort sá síðarnefndi bæri ábyrgð á nýlegum skrifum á amx-vefnum. Mikið hefur verið fjallað um framboð Þóru í fuglahvísli Amx að undanförnu og virðist sem Svavar hafi verið ósattur við skrifin. Hannes segir frá þessu í nýju bloggi á Pressunni.
Hannes segist hafa séð það í morgun, þegar hann skoðaði tölvupóstinn sinn, að þar væru skilaboð frá Svavari: „Sæll. Er það rétt sem menn segja að þú berir ábýrgð á lygunum sem birtast undir fuglahvísli á AMX?“ Hannes segist hafa svarað um hæl. „Sæll. Ég hef verið erlendis og kom til landsins á laugardagskvöld. Ég hef hvergi látið í ljós neina skoðun á þessu forsetakjöri og því síður skrifað neitt um það á amx.is. Ég kann satt að segja ekki við þann tón, sem er í þessari orðsendingu þinni, þótt send sé klukkan hálfþrjú um nótt.“
Þá spurði Hannes Svavar hvar umræddar lygar væri að finna á vef Amx. „En hvar eru lygarnar? Að Þóra hafi verið í Alþýðuflokknum eins og segir á amx.is? Eða kennt í stjórnmálaskóla Samfylkingarinnar eins og þar segir líka? Hið fyrra hefur ekki verið vefengt. Og í auglýsingu í fjölmiðlum um stjórnmálaskóla Samfylkingarinnar 2002 var Þóra sögð kennari þar. Eru það ósannindi? Hver ber þá ábyrgð á þeim? Helgi Hjörvar, skólastjórinn? Munuð þið Þóra fordæma slík vinnubrögð Samfylkingarinnar?“ Svo virðist sem Svavar hafi ekki ennþá svarað spurningum Hannesar, og alls óljóst hvort hann geri það.
Hemmi Gunn fallinn frá