Ljósmyndarar sitja fyrir Tom Cruise á Íslandi

Erlendir ljósmyndarar sitja fyrir bandaríska leikaranum Tom Cruise sem er við tökur á myndinni Oblivion hér á landi. Greint var frá þessu á vef Ríkisútvarpsins en þar segir að ljósmyndararnir sitjir fyrir stjörnunni og fjölskyldu hans þar sem þau dvelja á Norðurlandi.

Sést hefur til ljósmyndara í Vaðlabyggð þar sem þeir nota aðdráttarlinsur til að ná myndum af leikaranum. „Við getum tekið myndir í allt að eins kílómetra fjarlægð og erum með fín gæði,“ segir ljósmyndarinn Paul Hennessy við Ríkisútvarpið en hluti myndanna birtist á fréttavefnum Splash News.