Dauðsfall á Radiohead tónleikum

Að minnsta kosti einn lét lífið þegar svið hrundi á tónleikastað í Toronto skömmu áður en breska sveitin Radiohead átti að stíga á svið, að því er fram kemur í fjölmiðlum í Kanada.

Þrír slösuðust og af þeim einn lífshættulega þegar sviðið við Downsview Park hrundi.

Atvikið átti sér stað klukkutíma áður en hleypa átti áhorfendum inn á tónleikasvæðið.

Liðsmenn Radiohead létu hafa eftir sér á samskiptasíðunni Twitter að tónleikunum hefði verið frestað vegna ófyrirséðra aðstæðna.