Komst sjálfur út úr brennandi húsi á Seyðisfirði

Eigandi veitingastaðarins Kaffi Lára komst sjálfur út úr húsinu eftir að kviknaði þar í fyrr í kvöld. Hann sakaði ekki og þurfti ekki á aðstoð að halda við að koma sér út úr húsinu. Slökkvistarfi er lokið en slökkviliðið er þó enn á svæðinu. Að sögn lögreglunnar á staðnum er húsið mikið skemmt, ef ekki ónýtt.

Björgunarsveitir frá Seyðisfirði og Egilstöðum voru kallaðar á staðinn til að aðstoða slökkviliðið við störf sín og til að aðstoða lögregluna við að loka svæðinu. Mikill eldur var í húsinu um tíma en að sögn lögreglu virðist eldurinn hafa verið nokkuð staðbundinn. Vel gekk að ráða niðurlögum eldsins.