„Sjálfstæðisflokkurinn er kominn aftur“

„Þetta eru slæmar fréttir fyrir ríkisstjórnina,“ segir Birgir Guðmundsson stjórnmálafræðingur um niðurstöðu þjóðarpúls Gallup þar sem ríkisstjórnarflokkarnir mælast með 28 prósenta fylgi. Aðeins einu sinni hefur stuðningur við ríkisstjórn mælst minni. Það var í kjölfar bankahrunsins þegar búsáhaldabyltingin stóð sem hæst og krafan um að Geir H. Haarde og ríkisstjórn Sjálfstæðisflokks og Samfylkingar færi frá.

„Þetta sýnir að uppstokkunin og andlitslyftingin um áramótin hefur ekki gert nein kraftaverk fyrir fylgi ríkisstjórnarinnar. Fylgið heldur áfram að dala.“

Birgir segir þetta meðal annars skýrast af því að stjórnin hafi þá ímynd, óháð því hver veruleikinn er, að hún sé ekki að taka á þeim málum sem heitast brenna á fólki. Efnahagsmálin, verðbólgan og skuldir heimilanna eru „eins og opið sár á þjóðarlíkamanum,“ segir Birgir.

Hann segir niðurstöðu könnunarinnar sýna að Sjálfstæðisflokkurinn sé nú kominn fram sem raunverulegur valkostur og sé að taka til sín mikið fylgi.

„Sjálfstæðisflokkurinn er kominn aftur í stjórnmálin sem valkostur með fylgistölur sem ekki hafa sést lengi hjá þeim.“

Að sama skapi segir Birgir athyglisvert að Framsóknarflokknum virðist ekki hafa tekist að festa sig í sessi á þessum óánægjutímum sem raunverulegur valkostur við ríkisstjórnina. Flokkurinn mælist með 13 prósenta fylgi. „Framsókn á í einhverjum vandræðum með að taka til sín af óánægju með ríkisstjórnina. Þeim er ekki að takast að ná vopnum sínum.“

Samfylkingin mælist með 17 prósenta fylgi og Vinstri græn 11 en ljóst er að Sjálfstæðisflokknum vex fiskur um hrygg með hverjum mánuðinum og með hverri umdeildri og óvinsælli ákvörðun ríkisstjórnarinnar.

Merkilegt fylgi nýrra framboða

Í könnunni kemur fram að nýju stjórnmálaöflin mælast ágætlega. Samstaða mælist með 9 prósenta fylgi, Dögun 5 prósent og Björt framtíð tæplega 5.

„Þetta er merkilegt hvað þau fá samanlagt mikið fylgi og tæplega fimmti hver kjósandi sem er reiðubúinn að kjósa þau án þess í raun og veru að vita fyrir hvað þau standa. Og þetta fylgi kemur fyrst og fremst stjórnarflokkunum í koll því mér finnst líklegt að þetta séu hópar sem hefðu annars verið stjórnarflokkamegin,“ segir Birgir um nýju framboðin. Hann segir Sjálfstæðisflokkinn skýran valkost hægra megin en á miðjunni og vinstri vængnum sé meiri óvissa og flökt á kjósendum.

„Ef þetta væri eitt framboð sem hefði komið fram í stað þessara þriggja þá væri um að ræða flokk sem væri að mælast á stærð við Samfylkinguna.“

Nánar er fjallað um málið í páskablaði DV